એઈમ્સ આજથી SPGના કબજામાં

ચકલું’ય ન ફરકે તેવી સજ્જડ સુરક્ષા-વ્યવસ્થા: એસપીજીના આઈજી રાજીવ રંજન ભગતે હોસ્પિટલના ખૂણા ખૂણાનું કર્યું નિરીક્ષણ
આરોગ્ય અને પરિવાર કલ્યાણ મંત્રાલયના સેક્રેટરી અપૂર્વા ચંદ્રા-જોઈન્ટ સેક્રેટરી અંકિતા મિશ્રા બુંદેલા પણ એઈમ્સ પહોંચ્યા: છેલ્લી ઘડીની તૈયારીઓને અપાઈ રહેલો ઓપ
રવિવારે વડાપ્રધાન એઈમ્સમાં ૨૦થી ૨૫ મિનિટ સુધીનું રોકાણ કરશે

ગુજરાતની સૌથી પહેલી એઈમ્સ હોસ્પિટલનું રાજકોટમાં નિર્માણ થઈ રહ્યું છે. ત્રણ વર્ષથી અહીં ઓપીડી કાર્યરત થયા બાદ હવે ૨૫ ફેબ્રુઆરીથી અહીં દર્દીઓને દાખલ કરવાનું શરૂ કરવામાં આવનાર છે ત્યારે લોકો માટે અત્યંત આશીર્વાદસમી આ સુવિધાનું વડાપ્રધાન નરેન્દ્રભાઈ મોદીના હસ્તે ઉદ્ઘાટન થવાનું છે. આ કાર્યક્રમને ધ્યાનમાં રાખી કલેક્ટર, એઈમ્સ અને પોલીસ એમ ત્રણેય તંત્રમાં જોરદાર દોડધામ ચાલી રહી છે. બીજી બાજુ વડાપ્રધાનની સુરક્ષાને ધ્યાનમાં રાખી એઈમ્સ હોસ્પિટલનો કબજો આજ અથવા કાલથી સ્પેશ્યલ પ્રોટેક્શન ગ્રુપ (એસપીજી) લઈ લેનાર હોવાનું જાણવા મળી રહ્યું છે.

દરમિયાન વડાપ્રધાનની એઈમ્સ મુલાકાત દરમિયાનના રૂટ ઉપરાંત હોસ્પિટલમાં તેઓ કઈ કઈ જગ્યાનું નિરીક્ષણ કરશે અને તેના માટે સુરક્ષાની દૃષ્ટિએ કેવી તૈયારી છે તેનું નિરીક્ષણ કરવા માટે એસપીજીના આઈજી રાજીવ રંજન ભગત દ્વારા હોસ્પિટલની મુલાકાત લેવામાં આવી હતી. આ વેળાએ તેમની સાથે એઈમ્સ-રાજકોટના એક્ઝિક્યુટિવ ડિરેક્ટર પ્રોફેસર ડૉ.(કર્નલ) સીડીએસ કટોચ, ડેપ્યુડી ડિરેક્ટર કર્નલ પુનિત અરોરા સહિતની ટીમ સાથે રહી હતી. તેમણે હોસ્પિટલના દરેક ખૂણાનું એકદમ બારિકાઈથી નિરીક્ષણ કર્યા બાદ જરૂરી સુચન પણ કર્યા હોવાનું જાણવા મળ્યું છે. એકંદરે આજથી એઈમ્સમાં ચક્લું’ય ન ફરકે તેવી જડબેસલાક સુરક્ષા-વ્યવસ્થા ગોઠવી દેવામાં આવી છે.

આ ઉપરાંત આરોગ્ય અને પરિવાર કલ્યાણ મંત્રાલયના સેક્રેટરી અપૂર્વા ચંદ્રા, જોઈન્ટ સેક્રેટરી અંકિતા મિશ્રા બુંદેલાએ પણ હોસ્પિટલની મુલાકાત લઈ તૈયારીઓને અંતિમ ઓપ આપ્યો હતો.

જાણવા મળ્યા પ્રમાણે રવિવારે વડાપ્રધાન એઈમ્સ હોસ્પિટલમાં ૨૦થી ૨૫ મિનિટ સુધીનું રોકાણ કરી અહીં કેવી કેવી વ્યવસ્થા છે તેનું નિરીક્ષણ કરી શકે છે.