ઈલેક્ટ્રિક માર્કેટમાં ખરીદીનો સોલિડકરંટ’: ૨૫ કરોડના મોબાઈલ-ટીવી-ફ્રિઝ ખરીદાયા
ઘણા વર્ષો બાદ પગાર-બોનસ બન્ને સાથે મળે તેવી તારીખે' દિવાળી આવતાં મન મુકીને ખરીદી
૧૦ હજારથી લઈ ૧.૫૦ લાખ સુધીના ૫૦૦૦થી વધુ મોબાઈલ ઉપરાંત ૧૫૦૦થી ૨૦૦૦ ટીવી, ૧૦૦૦ ફ્રિઝ, ૧૦૦૦ જેટલા વોશિંગ મશીનની ખરીદીનો અંદાજ: યંગસ્ટર્સમાં એપલ-સેમસંગ મોબાઈલ, ટીવીમાં સોની-એલજી, વોશિંગ મશીનમાં એલજી, વ્હર્લપુલ સહિતની કંપનીની ખરીદી વધુ
ઓછા ભાવે વધુ ફિચર્સ ધરાવતાં સ્માર્ટ ટીવી'ની ખરીદી પણ
બંબાટ’: ઘણા વર્ષો બાદ દિવાળી શુકનવંતી' સાબિત થતાં ડિલરો, નાના-મોટા વેપારીઓ ખુશખુશાલ: એસ્ટ્રોન ચોકની મોબાઈલ માર્કેટ રોશનીથી ઝળહળી ઉઠી, આખા રસ્તે ડી.જે.ની ધૂમ વૉઈસ ઑફ ડે, રાજકોટ દિવાળીની ધમાકેદાર ઉજવણી શરૂ થઈ ચૂકી છે. આ એક જ પર્વ એવું છે જેમાં લોકો સોયથી માંડી મોટરકાર સુધીની વસ્તુઓ નવી-નક્કોર જ ખરીદવા માટે પડાપડી કરતા હોય છે. પાછલા વર્ષોમાં દિવાળી પર મોબાઈલ, ટીવી, ફ્રિઝ, વોશિંગ મશીન સહિતની વસ્તુઓની ખરીદી ખાસ કરીને દિવાળી પર જ કરવાનો ટે્રન્ડ વધ્યો હોય આ વર્ષે તેમાં જબદરસ્ત ઉછાળો નોંધાયો હોવાનું માર્કેટમાંથી જાણવા મળી રહ્યું છે. ઈલેક્ટ્રોનિક માર્કેટના નિષ્ણાતોના અંદાજ પ્રમાણે આ વર્ષની દિવાળી પર ૨૫ કરોડથી વધુના મોબાઈલ, ટીવી, ફ્રિઝ સહિતના ઉપકરણોનું વેચાણ થયું છે જે પાછલા વર્ષો કરતાં ઘણું વધુ છે. વધુ ખરીદી થવા પાછળ આમ તો ઘણા બધા કારણો જવાબદાર છે પરંતુ સૌથી મુખ્ય કારણ એ રહ્યું કે આ વર્ષે પગાર-બોનસ બન્ને સાથે મળ્યા હોવાથી ખરીદીમાં
કરંટ’ જોવા મળી રહ્યો છે.
મોબાઈલ માર્કેટ પાસેથી જાણવા મળેલી વિગતો પ્રમાણે ૧૦ હજારથી લઈ ૧.૫૦ લાખ સુધીના ૫૦૦૦થી વધુ મોબાઈલનું વેચાણ થયું છે. આ વર્ષની દિવાળીએ એપલ-સેમસંગના મોંઘાદાટ' ગણાતાં મોબાઈલ અંદાજે ૧૫૦૦થી વધુ વેચાયા છે. આ ઉપરાંત વીવો, ઓપ્પો, એમઆઈ સહિતની મધ્યમ રેન્જના મોબાઈલનું વેચાણ પણ નોંધપાત્ર રહેવા પામ્યું છે. મોટાભાગના લોકોએ આ વર્ષે રોકડથી જ ખરીદી કરવાનો આગ્રહ રાખ્યો છે તો મોંઘા મોબાઈલની ખરીદી માટે લોકોએ ક્રેડિટ કાર્ડનો વપરાશ વધુ કર્યો છે કેમ કે તેનાથી કેશબેક (રોકડ વળતર) ઘણું બધું મળી રહ્યું હતું. આવી જ રીતે લોન પર લેનારા ખરીદારોની સંખ્યા પાછલા વર્ષો કરતા ઓછી રહેવા પામી છે. આવી જ રીતે ટીવી, ફ્રિઝ, વોશિંગ, મશીનનું વેચાણ પણ ઘણું બધું રહેવા પામ્યું છે. ખાસ કરીને ટીવીમાં સોની-એલજી, વોશિંગ મશીનમાં એલજી-વ્હર્લપુલ કંપનીની ખરીદી વધુ જોવાઈ છે. આવી જ રીતે ઓછા ભાવે વધુ ફિચર્સ ધરાવતાં ટીવીનું વેચાણ પણ નોંધપાત્ર રહ્યું હોવાનું માર્કેટ નિષ્ણાતોએ જણાવ્યું છે. એકંદરે ઈલેક્ટ્રોનિક માર્કેટ માટે આ વર્ષની દિવાળી
સુપરહિટ’ નિવડી હોવાથી નાના-મોટા તમામ વેપારીઓ ખુશખુશાલ જોવા મળી રહ્યા છે. રાજકોટનો એસ્ટ્રોન ચોક હવે મોબાઈલ માર્કેટ બની ગયો હોય અહીં અનોખો શણગાર કરવામાં આવ્યો છે તો ડી.જે.ની ધૂમથી અલગ જ માહોલ જોવા મળી રહ્યો છે.
ઑનલાઈન માર્કેટની કોઈ અસર નથી: લોકો વસ્તુ જોઈને જ ખરીદવાનું કરે છે પસંદ
સ્થાનિક વિક્રેતાઓના જણાવ્યા પ્રમાણે પાછલા વર્ષે ઓનલાઈન માર્કેટની થોડી અસર જોવા મળી હતી પરંતુ આ વર્ષે કોઈ જ અસર વર્તાઈ રહી હોય તેવું લાગી રહ્યું નથી. વેપારીઓએ તર્ક સાથે જણાવ્યું કે ઓનલાઈન વસ્તુ ખરીદતી વખતે ગ્રાહકોને હાથમાં તે વસ્તુ જોવા મળતી હોતી નથી એટલા માટે ઘણી વખત છેતરાવાનો વારો આવતો હોવાથી લોકો તેનાથી બચવા માટે વસ્તુ જોઈને જ ખરીદવાનું પસંદ કરી રહ્યા છે.
ડિઝિટલ વૉચ, ઈયર બર્ડસ, નેકબેન્ડ, હેન્ડસ-ફ્રી સહિતની એસેસરીઝનું વેચાણ ધૂમ
મોબાઈલની સાથે જ ડિઝિટલ વોચ, ઈયર બર્ડસ, નેકબેન્ડ, હેન્ડસ-ફ્રી સહિતની અવનવી એસેસરીઝનું વેચાણ પણ આ વર્ષે નોંધપાત્ર રહ્યું હોવાનો મત વેપારીઓ આપી રહ્યા છે. લોકો નવો મોબાઈલ ખરીદે એટલે તેની સાથે ટફન, નેકબેન્ડ, ઈયર બર્ડસ જરૂર ખરીદતા હોય તેનું વેચાણ પણ જોરદાર થયું છે.
૧૫થી લઈ ૫૦% ડિસ્કાઉન્ટ ! ખરીદી માટે સોનામાં સુગંધ ભળી
દર વર્ષની દિવાળીની જેમ આ વર્ષે પણ મોબાઈલ, ટીવી, ફ્રિઝ, વોશિંગ મશીનમાં ૧૫થી ૫૦% સુધીનું ડિસ્કાઉન્ટ આપવામાં આવી રહ્યું હોવાથી ખરીદીને વેગ મળ્યો છે સાથે સાથે ગ્રાહકો અને વેપારીઓ પણ સોનામાં સુગંધ ભળી ગયાનું માની રહ્યા છે.