વૉકહાર્ટ, સ્ટર્લિંગ, જલારામ અને કેન્સર હોસ્પિટલને ૭.૫૦ લાખનો દંડ
દર્દી પાસે આયુષ્યમાન કાર્ડ હોવા છતાં વધારાના પૈસા પડાવ્યા હોવાનું ખુલ્યું
સરકાર દ્વારા ગરીબ અને જરૂરિયાતમંદ દર્દીઓને વિનામૂલ્યે સારવાર મળી રહે તે માટે આયુષ્યમાન ભારત સહિતની યોજના ચલાવવામાં આવી રહી છે. આ કાર્ડ થકી દર્દી હોસ્પિટલમાં દાખલ થાય એટલે વિનામૂલ્યે તેની સારવાર કરવાની હોય છે પરંતુ રાજકોટની વૉકહાર્ટ, સ્ટર્લિંગ, જલારામ અને કેન્સર હોસ્પિટલમાં દર્દીઓ પાસે કાર્ડ હોવા છતાં યેનકેન પ્રકારે પૈસા પડાવવામાં આવ્યા હોવાનું ધ્યાન પર આવતાં જ સરકારના આરોગ્ય વિભાગે મહાપાલિકાને સાથે રાખીને ચારેય હોસ્પિટલને ૭.૫૦ લાખ રૂપિયાનો દંડ ફટકારતાં ખળભળાટ મચી જવા પામ્યો છે.
અત્યારે સરકારનું રાજ્યવ્યાપી હોસ્પિટલ ચેકિંગ અભિયાન ચાલી રહ્યું છે જેમાં આરોગ્ય અધિકારીઓની ટીમ, જિલ્લાના નોડલ અધિકારી અને મહાપાલિકાના આરોગ્ય અધિકારીની ટીમોએ હેલ્થ કાર્ડ અંતર્ગત સારવાર આપતી હોસ્પિટલોમાં ચકાસણી કરવામાં આવે છે. નિયમિત રીતે બિલ, ક્લેઈમ, ખર્ચ સહિતના ઓડિટ કરવામાં આવે છે તે બાદ આરોગ્ય વિભાગ દંડની નોટિસ ફટકારે છે.
આ અંગેનું ચેકિંગ વૉકહાર્ટ હોસ્પિટલમાં કરવામાં આવતાં તેના દ્વારા ૧૮ દર્દી પાસેથી બિલ ઉપરાંતની રકમ વસૂલવામાં આવી હોવાનું ખુલતાં તેને ૩.૪૫ લાખ, કેન્સર હોસ્પિટલને ૨.૮૩ લાખ, સ્ટર્લિંગ હોસ્પિટલને ૫૨ હજાર અને જલારામ-રઘુકુળ હોસ્પિટલને ૮૫ હજારનો દંડ ફટકારવામાં આવ્યો છે. આ સાથે જ એવી તાકિદ પણ કરવામાં આવી છે કે કાર્ડ હોય તે દર્દી પાસેથી વધારાનો ચાર્જ ન વસૂલવો અને જો લેવામાં આવશે તો હોસ્પિટલનું લાયસન્સ સસ્પેન્ડ કરવા સહિતની આકરી કાર્યવાહી કરવામાં આવશે.
