પાટણમાં નાયબ મામલતદાર પાંચ લાખની લાંચ લેતા ઝડપાયો

જમીન બિનખેતી કરવા માટે ની ફાઈલ ક્લિયર કરાવવા લાંચ માગી હતી

પાટણનો એક નાયબ મામલતદાર પાંચ લાખ રુપિયાની લાંચ લેતા ઝડપાયો છે. જમીનને બીનખેતી કરવા માટે થઈને અરજી કરી હતી. જેની પર કાર્યવાહી કરીને જમીન એનએ કરી આપવા માટે પાંચ લાખ રુપિયાની રકમની માંગણી નાયબ મામલતદારે કરી હતી.

એસીબીએ નાયબ મામલતદાર અલ્પેશ ખેરને રંગેહાથ ઝડપી લઈને કાર્યવાહી કરી છે.જમીન ખરીદ્યા બાદ ફરિયાદીએ એનએ કરવા માટેની કાર્યવાહી કરી હતી. પરંતુ તેમનુ કાર્ય જાણે કે લાંચ વિના આગળ વધે જ નહીં એવી સ્થિતિ સર્જાઈ હોય એમ નાયબ મામલતદારે પાંચ લાખ રુપિયાની રકમની માંગણી કરી હતી. નાયબ મામલતદાર કક્ષાના કર્મચારીઓ આટલી મોટી રકમની લાંચની માંગણી કરતા હશે, તો તેમના ઉચ્ચ અધિકારીઓના આંકડા કેવા હશે એવા પણ સવાલો થવા લાગ્યા છે. આરોપી નાયબ મામલતદાર અલ્પેશ ખેરે ફરિયાદીની જમીન બિન ખેતી કરવા માટે પાંચ લાખની માંગણી કરી હતી.

આ માંગણી કરેલ રકમ પહોંચાડવા માટે સ્થળ અને સમય આપ્યો હતો. આ માટે ફરિયાદીએ એસીબીને કરેલી ફરિયાદ મુજબ છટકાના આયોજન સાથે જ દર્શાવેલ સ્થળ પર પહોંચ્યો હતો. પાટણ શહેરમાં આવેલ જનતા હોસ્પિટલ પાસેની ધ જનતા મેડીકલ સ્ટોરમાં જઈને લાંચની રકમ અંગેની વાતચીત કરી હતી.ખેરે સાથે લાંચ અંગેની વાતચીત કરી હતી. આરોપી નાયબ મામલતદાર અલ્પેશ ખેરે લાંચની રકમ અંગેની વિગતે વાત કરીને તેને રોકડમાં સ્વિકારી લીધી હતી. બીજી તરફ આવડી મોટી રકમની લાંચની ગંભીરતા મુજબ ચૂસ્ત આયોજન સાથે અલ્પેશ ખેરની આસપાસ સરકારી પંચો રુબરુ હાજર રાખવા સાથે જરુરી ઉપકરણો ગોઠવીને તમામ વિગતો સાથેના પૂરાવા ટ્રેપ દરમિયાન જ એકઠા કરી લીધા હતા. એસીબીની અલગ અલગ ટીમ દ્વારા હવે નાયબ મામલતદારના ઘરે પણ સર્ચની કાર્યવાહી શરુ કરવામાં આવી છે.

લાંચના છટકાનુ સફળ આયોજન પાટણ એસીબી પોલીસ ઈન્સપેક્ટર એમજે ચૌધરીએ કર્યુ હતુ. અને હવે લાંચમાં કોનો કોનો હિસ્સો હતો અને જે અધિક ક્લેકટર કચેરી શાખામાં ફરજ બજાવે છે, ત્યાં અન્ય કોઈ અધિકારીઓનો હિસ્સો લાંચમાં હતો કે કેમ એ દીશામાં પણ તપાસ હાથ ધરવામાં આવશે. આ માટે છટકા દરમિયાનની વાતચિત અને ધરપકડ બાદ શરુ કરેલ પૂછપરછ મહત્વની બની રહેશે.