ક્ષત્રિય આંદોલનને લીધે ભાજપનો 8 બેઠકો પર પરાજય થઇ શકે : પી.ટી જાડેજા

ક્ષત્રિય સમાજમાં કોઈ ભાગલાં પડ્યા નથી : આંદોલનને ગામડા સુધી લઇ જવાનું આયોજન

રક્જોતમાં પુરુષોત્તમ રૂપાલા સામે ચાલી રહેલા ક્ષત્રિયોના આંદોલનનો એક ભાગ રહેલા પી.ટી.જાડેજાએ આ આંદોલનને લીધે ભાજપને આઠ બેઠક ઉપર પરાજયનો સામનો કરવો પડી શકે છે તેમ જણાવ્યું હતું.

આ ક્ષત્રિય આંદોલન ભાજપને ભારે પડવાનું છે તેમ કહેતા પી.ટી.જાડેજાએ દાવો કર્યો હતો કે ક્ષત્રિય આંદોલનમાં કોઈ ભાગલા પડ્યા નથી. બીજા તબક્કાના આંદોલનની જાહેરાત કરી દેવામાં આવી છે અને હવે . ધર્મ રથ થકી ભાજપના વિરોધ કરવાનો કાર્યક્રમ છે. ક્ષત્રિય સમાજના અગ્રણીઓ રવિવારે ખોડલધામ દર્શન કરવા માટે જશે.

તેમણે દાવો કર્યો હતો કે ક્ષત્રિય આંદોલનથી ભાજપને 8 બેઠકો પર હરાવી શકાશે. રૂપાલા ઉમેદવારી પાછી ન ખેચે તો ભાજપ વિરૂદ્ધ મતદાન કરવામાં આવશે અને તેની અસર રાજકોટ,જામનગર,પાટણ, બનાસકાંઠા બેઠક પર વધુ રહેશે. ક્ષત્રિય આંદોલન ગ્રામ્ય વિસ્તાર સુધી લઇ જવાનું આયોજન છે. આ ઉપરાંત ઉત્તર,મધ્ય અને દ.ગુજરાતમાં કાર્યક્રમો અપાશે. ધર્મરથ થકી ભાજપ વિરૂદ્ધ મતદાનની અપીલ કરાશે.

પીટી જાડેજાએ કહ્યુ કે રાજપૂત સમાજે રૂપાલાને હટાવવાની માંગ યથાવત રાખી છે. સરકાર વાત નથી માનતી ત્યારે રાજપૂત સમાજે સ્પષ્ટ સ્ટેન્ડ લીધુ છે. 20 વર્ષથી ક્ષત્રિય સમાજને ટિકિટ અપાઇ નથી.શાસક પક્ષે બે દશકથી ક્ષત્રિયોને અન્યાય કર્યો છે. દેશને એક બનાવનાર સમાજને ભાજપે અન્યાય કર્યો છે. ભાજપ વિરૂદ્ધ મતદાન કરવાની અમે અપીલ કરી છે. કોઈ પક્ષને ટેકો આપવા નહીં, પરંતુ ભાજપને હરાવવા અપીલ કરી છે. હજી સમય છે 22 તારીખ સુધી રૂપાલા ઉમેદવારી પત્રક પરત ખેંચી લે.

તેમણે અંતમાં એવું પણ કહ્યું હતું કે, આ આંદોલન અમારું કોંગ્રેસ માટે નથી. એક સાથે 400 ક્ષત્રિયો ઉભા રહે તો અમારા મત ડાયવર્ટ થઈ જાય. હજી પણ સમય છે 22 તારીખ સુધીમાં પરસોતમ રૂપાલા પોતાની ઉમેદવારી પરત ખેંચી લે. ભાજપ સાથે જોડાયેલા ક્ષત્રિયોને અમારે સાથે લાવવા પણ નથી તે ભાજપમાં છે તો ભાજપમાં રહે. અમારૂ યુદ્ધ હાર જીતની નથી અમારું યદ્ધ ધર્મનું છે.