યુનોમાં નરેન્દ્ર મોદીના સ્થાને એસ.જયશંકર સંબોધન કરશે

• કાર્યક્રમમાં છેલ્લી ઘડીએ ફેરફાર : મોદી ન્યુયોર્કમાં ભારતીયોને સંબોધશે

વડાપ્રધાન નરેન્દ્ર મોદી ચાલુ માસના અંત ભાગમાં અમેરિકાના પ્રવાસે જવાના છે અને ત્યાં મૂળ કાર્યક્રમ પ્રમાણે સંયુક્ત રાષ્ટ્રમાં સંબોધન કરવાના હતા પરંતુ તેમાં ફેરફાર થવાની શક્યતા છે. પ્રાપ્ત માહિતી અનુસાર, સંયુક્ત રાષ્ટ્રના સત્રમાં નરેન્દ્ર મોદીની જગ્યાએ વિદેશ મંત્રી એસ.જયશંકર સંબોધન કરી શકે છે.

વડાપ્રધાન આ મહિનાના અંતમાં ન્યૂયોર્કની મુલાકાતે જવાના છે. તે લોંગ આઇલેન્ડમાં 16,000 સીટ નાસાઉ વેટરન્સ મેમોરિયલ કોલિઝિયમ ખાતે 22 સપ્ટેમ્બરે એક વિશાળ જનમેદનીને સંબોધન કરવાના છે.

યુએન મહાસભાના 79મા સત્રની સામાન્ય ચર્ચા માટે યુનાઈટેડ નેશન્સ દ્વારા જુલાઈમાં બહાર પાડવામાં આવેલી કામચલાઉ યાદીમાં કહેવામાં આવ્યું હતું કે મોદી 26 સપ્ટેમ્બરે ઉચ્ચ સ્તરીય ચર્ચામાં નિવેદન આપશે. જો કે, હવે જાહેર કરવામાં આવેલી સુધારેલી કામચલાઉ યાદી અનુસાર, વિદેશ મંત્રી જયશંકર હવે પીએમ મોદીની જગ્યાએ 28 સપ્ટેમ્બરે યોજાનારી સામાન્ય ચર્ચામાં સંબોધન કરે તેવી શક્યતા છે. જનરલ એસેમ્બલી અને કોન્ફરન્સ મેનેજમેન્ટના અંડર-સેક્રેટરી-જનરલ મૂવ્સ એબેલિયન દ્વારા હસ્તાક્ષર કરાયેલ એક નોંધ સૂચિ સાથે જાહેર કરવામાં આવી છે.

સંયુક્ત રાષ્ટ્ર મહાસભાના 79મા સત્રના પ્રમુખ દ્વારા સંબોધન કરવામાં આવશે. આ સત્ર પહેલાં ગુટેરેસ 22-23 સપ્ટેમ્બર દરમિયાન ‘સમિટ ફોર ધ ફ્યુચરઃ મલ્ટિલેટરલ સોલ્યુશન્સ ફોર એ બેટર ટુમોરો’નું આયોજન કરશે. આ સમિટ દરમિયાન, વિશ્વના નેતાઓ ભવિષ્ય માટે સંધિ અપનાવવા સંયુક્ત રાષ્ટ્રમાં ભેગા થશે. જેમાં વૈશ્વિક ડિજિટલ કરાર અને ભાવિ પેઢીઓ પર ઘોષણા પૂરક ભાગ તરીકે સામેલ હશે.