ટ્રાફિક નિયમ તોડવા પર લાયસન્સ રદ! ગડકરીની બાઈક ટેક્સી યોજના

દેશમાં રોજગારીની નવી તકો ઊભી કરવા અને માર્ગ અકસ્માતો પર લગામ કસવા માટે કેન્દ્ર સરકારે હવે કડક અને લોકઉપયોગી પગલાં લેવાનું શરૂ કર્યું છે. કેન્દ્રીય મંત્રી નીતિન ગડકરી દ્વારા જાહેરમાં કરવામાં આવેલી આ નવી ઘોષણાઓ ટ્રાફિક વ્યવસ્થા અને પરિવહન ક્ષેત્રમાં મોટો બદલાવ લાવવા માટે તૈયાર છે.

દેશભરમાં બાઈક ટેક્સી શરૂ કરવા રાજ્યોને અપીલ

કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ દેશના તમામ રાજ્યોને ખાનગી ટુ-વ્હીલર વાહનો દ્વારા બાઇક ટેક્સી સેવા શરૂ કરવાની મંજૂરી આપવા વિશેષ અપીલ કરી છે. તેમણે ભારપૂર્વક જણાવ્યું છે કે જો તમામ રાજ્યો આ યોજનાને મંજૂરી આપે, તો ગ્રામીણ વિસ્તારો અને નાના નગરોમાં આશરે 8 કરોડ લોકોને રોજગારી અને આજીવિકાની નવી તકો મળી શકે છે. જોકે, ટ્રાન્સપોર્ટ વિષય રાજ્ય સરકારોના અંડરમાં આવતો હોવાથી કેટલાક રાજ્યોમાં હજુ આ અંગે સ્પષ્ટતા બાકી છે.

આ પણ વાંચો: પાકિસ્તાનનો સાથ આપનાર તૂર્કિયેનો યુ-ટર્ન: ભારત સાથે સંબંધો સુધારવા માસ્ટરપ્લાન!

ટ્રાફિક નિયમોના ભંગ પર નવી ‘નેગેટિવ પોઈન્ટ સિસ્ટમ’

માર્ગ અકસ્માતોના વધતા આંકડાઓને અટકાવવા માટે મોટર વાહન અધિનિયમમાં સુધારો કરીને કડક ‘નેગેટિવ પોઇન્ટ સિસ્ટમ’ લાવવાની જાહેરાત કરવામાં આવી છે. આ સિસ્ટમ હેઠળ જ્યારે પણ કોઈ વાહનચાલક ટ્રાફિકના નિયમો તોડશે, ત્યારે તેના લાયસન્સ પર નેગેટિવ પોઇન્ટ્સ કપાશે. જો આ પોઇન્ટ્સ મર્યાદા કરતાં વધી જાય, તો ચાલકનું ડ્રાઇવિંગ લાયસન્સ સસ્પેન્ડ કે કાયમ માટે રદ કરી દેવામાં આવશે, જેનાથી ડ્રાઇવરોમાં શિસ્ત આવશે.

ડ્રાઇવરોના સ્વાસ્થ્ય માટે ‘સુરક્ષા’ પાયલટ પ્રોજેક્ટ

હાઇવે નિર્માણ અને માઇનિંગ ક્ષેત્રે કામ કરતા ડ્રાઇવરોના સ્વાસ્થ્યની કાળજી લેવા માટે ‘સુરક્ષા’ નામનો પાયલટ પ્રોગ્રામ શરૂ કરાયો છે. આ પ્રોજેક્ટ હેઠળ ડ્રાઇવરોને સ્થળ પર જ ફ્રી મેડિકલ તપાસ અને હેલ્થ કાઉન્સેલિંગ પૂરું પાડવામાં આવશે. હાલમાં આ પ્રોગ્રામ મહારાષ્ટ્રના નાગપુર-કામ્પ્ટી હાઇવે અને ચંદ્રપુર માઇનિંગ વિસ્તારના 150 કિમી પટ્ટામાં લાગુ કરાયો છે, જેમાં પ્રથમ તબક્કે 10,000 કામદારોને આવરી લેવાનું લક્ષ્ય છે.

આમ, નીતિન ગડકરીની આ પહેલ એક તરફ લાખો યુવાનોને રોજગારી પૂરી પાડવામાં મદદરૂપ સાબિત થશે, તો બીજી તરફ કડક ટ્રાફિક નિયમો દ્વારા માર્ગ સુરક્ષાને પણ મજબૂત બનાવશે.