બાળ વિકાસ અધિકારીએ જ સગીરા ઉપર દુષ્કર્મ આચર્યું
દિલ્હીમાં વાડે જ ચીભડાં ગળ્યા
દિવંગત મિત્રની પુત્રીને જ શિકાર બનાવી
દિલ્હીના મહિલા અને બાળ વિકાસ ખાતા ના ડેપ્યુટી ડાયરેક્ટર પ્રેમોદ્ય ખાખા એ એક સગીર બાળા ઉપર દુષ્કર્મ આચર્યું હોવાનો પર્દાફાશ થતાં ભારે ખળભળાટ મચી જવા પામ્યો છે. આ લંપટ અધિકારીએ પોતાના દિવંગત મિત્રની પુત્રીનો જ દેહ અભડાવવાનું ઘોર પાપ આચાર્ય હતું. દિલ્હીના મુખ્યમંત્રી કેજરીવાલે આ અધિકારીને સસ્પેન્ડ કરવાનો આદેશ કર્યો છે. બીજી તરફ પોલીસે હજુ પણ ધરપકડ ન કરતા ભારે આશ્ચર્ય સર્જાયું છે.
વિગતો મુજબ આરોપીના ખાસ મિત્રનું 2020 માં મૃત્યુ થયું હતું. બાદમાં સહાનુભૂતિનું નાટક કરી આરોપીએ સગીરાને પોતાના ઘરમાં આશરો આપ્યો હતો. પોલીસના જણાવ્યા મુજબ હતભાગી સગીરા ઉપર અનેક વખત દુષ્કર્મ કરાયું હતું. બાદમાં તે ગર્ભવતી બનતા આરોપીની પત્નીએ પોતાના પુત્ર પાસે મગવેલી દવા ખવડાવીને ગર્ભપાત કરાવી નાખ્યો હતો.
આ ભયંકર યાતનામાંથી પસાર થયેલી ગભરૂ બાળાને બાદમાં ચિંતા ના હુમલા શરૂ થતા હોસ્પિટલમાં ખસેડવામાં આવી હતી જ્યાં કાઉન્સેલર સાથેની વાતચીત દરમિયાન આ ધ્રુણાસ્પદ ઘટનાક્રમનો ભાંડો ફૂટ્યો હતો. આ બનાવમાં પોલીસે અધિકારીની હજુ સુધી ધરપકડ ન કરતા લોકરોષ ફાટી નીકળ્યો છે દિલ્હી કમિશન ફોર વુમને પોલીસને પત્ર લખી આરોપીની તાત્કાલિક ધરપકડ કરવા માગણી કરી છે.
