જ્યાં પ્રતિબંધ નથી ત્યાં ફટાકડા ફોડવા જાઓ, સુપ્રીમ કોર્ટની ભાજપ સાંસદ તિવારીને ટકોર
દીલ્હીમાં પ્રતિબંધ સામે કરેલી અરજી અદાલતે ફગાવી
સુપ્રીમ કોર્ટે દિલ્હીની અરવિંદ કેજરીવાલ સરકાર દ્વારા રાષ્ટ્રીય રાજધાનીમાં ફટાકડા ફોડવા પર લગાવવામાં આવેલા પ્રતિબંધ મામલે હસ્તક્ષેપ કરવાનો ઈનકાર કરી દીધો હતો . ભાજપના સાંસદ મનોજ તિવારીએ સુપ્રીમ કોર્ટનો દરવાજો ખખડાવ્યો હતો. કોર્ટે તેમની અરજી રદ કરી દીધી હતી. કોર્ટે એવી ટકોર કરી હતી કે જ્યાં પ્રતિબંધ ના હોય ત્યાં ફટાકડા ફોડવા ચાલ્યા જાઓ.
તાજેતરમાં જ કેજરીવાલ સરકારે એલાન કર્યું હતું કે, દિલ્હીમાં ફટાકડાનું વેચાણ, સંગ્રહ, નિર્માણ અને તેના ઉપયોગ પર સંપૂર્ણ પ્રતિબંધ રહેશે.
ત્યારબાદ આ કેસ સુપ્રીમ કોર્ટમાં પહોંચ્યો હતો. હવે સુપ્રીમ કોર્ટે કેજરીવાલ સરકારના આ નિર્ણયમાં હસ્તક્ષેપથી ઈનકાર કરી દીધો છે. કોર્ટના આ નિર્ણયને કેજરીવાલ સરકારની જીત તરીકે જોવામાં આવી રહ્યો છે. રિપોર્ટ પ્રમાણે સુનાવણી દરમિયાન કોર્ટે કહ્યું કે, લોકોનું સ્વાસ્થ્ય જરૂરી છે. જો સરકારે પ્રતિબંધ લગાવ્યો છે તો તેનો અર્થ પૂર્ણ પ્રતિબંધ છે.
કેજરીવાલ કેબિનેટમાં પર્યાવરણ મંત્રી ગોપાલ રાયે થોડા દિવસ પહેલા જ એ એલાન કર્યું હતું કે, દિલ્હીમાં ફટાકડાનું વેચાણ, સંગ્રહ, નિર્માણ અને તેને ફોડવા પર પ્રતિબંધ રહેશે. દિલ્હી સરકાર છેલ્લા ત્રણ વર્ષથી તમામ પ્રકારના ફટાકડા પર પ્રતિબંધ લગાવી રહી છે. દિલ્હી સરકારના મંત્રીએ તર્ક આપ્યો હતો કે, છેલ્લા પાંચ-છ વર્ષોમાં દિલ્હી વાયુ ગુણવત્તામાં ઘણો સુધારો નોંધાયો છે પરંતુ હજુ તેમાં વધુ સુધારો કરવાની જરૂર છે. તેને ધ્યાનમાં રાખીને ફટાકડા પર પ્રતિબંધનો નિર્ણય લેવામાં આવ્યો છે.
