દિલ્હી IAS કોચિંગ દુર્ઘટનાની તપાસ CBIને સોંપાઈ
- દિલ્હી હાઇકોર્ટનો આદેશ : મહાપાલિકા અને પોલીસને લગાવી આકરી ફટકાર
નવી દિલ્હી
દિલ્હીના જૂના રાજેન્દ્ર નગરમાં આવેલા આઈ.એ.એસ. કોચિંગ સેન્ટરમાં બનેલી દુર્ઘટનાની તપાસ સી.બી.આઈ.ને સોંપવાનો હાઇકોર્ટે આદેશ આપ્યો હતો. આ અકસ્માતના મામલામાં શુક્રવારે દિલ્હી હાઈકોર્ટમાં સુનાવણી હાથ ધરવામાં આવી હતી. દિલ્હી MCD કમિશનર અને DCP દિલ્હી હાઈકોર્ટમાં હાજર થયા. એમસીડીએ કહ્યું કે આ મામલે કાર્યવાહી કરવામાં આવી છે, અમે નાળાઓની સફાઈ પણ કરી છે. તેના પર હાઈકોર્ટે પૂછ્યું કે શું તમે મેદાનમાં જઈને નિરીક્ષણ કર્યું છે? તમામ દલીલો સાંભળ્યા બાદ દિલ્હી હાઈકોર્ટે રાજેન્દ્ર અકસ્માતની સીબીઆઈ તપાસનો આદેશ આપ્યો હતો.
કોર્ટે કહ્યું કે સીવીસીના વરિષ્ઠ અધિકારી તપાસ પર નજર રાખશે. દિલ્હી હાઈકોર્ટે કહ્યું કે MCDની સમસ્યા એ છે કે કોર્ટ દ્વારા સમયાંતરે આદેશ આપવા છતાં તે આદેશનો અમલ થતો નથી. અધિકારીઓ કાયદાના અધિકારક્ષેત્રની બહાર જઈ શકતા નથી.
દિલ્હી પોલીસે હાઈકોર્ટને જણાવ્યું કે પોલીસે સંપૂર્ણ તત્પરતા સાથે તપાસ કરી છે. કોર્ટમાં વ્યક્તિગત રીતે હાજર રહેલા ડીસીપીએ આ દુર્ભાગ્યપૂર્ણ ઘટના કેવી રીતે બની તેનું વર્ણન કર્યું હતું.
