• સરકારની તિજોરી છલકાઈ ; સીધા વેરાની આવક 20 ટકા વધી

• વસૂલાતનો આંકડો રૂપિયા 5.74 લાખ કરોડ ઉપર પહોંચી ગયો, પર્સનલ ઇન્કમ ટેક્સની આવક પણ વધી ગઈ

વોઇસ ઓફ ડે નવી દિલ્હી
બજેટ પહેલા કેન્દ્ર સરકારની તિજોરી છલકાઈ રહી છે. ચાલુ નાણાકીય વર્ષમાં અત્યાર સુધીમાં નેટ ડાયરેક્ટ કલેક્શન 19.54 ટકા વધીને રૂ. 5.74 લાખ કરોડથી વધુ થયું છે. કોર્પોરેટ કંપનીઓ દ્વારા વધુ એડવાન્સ ટેક્સ ભરવાને કારણે આ વધારો થયો છે. આમ સરકારની તિજોરી છલકાઈ રહી છે.

એડવાન્સ ટેક્સનો પ્રથમ હપ્તો (15 જૂન સુધી) 27.34 ટકા વધીને રૂ. 1.48 લાખ કરોડ થયો છે. તેમાં રૂ. 1.14 લાખ કરોડનો કોર્પોરેશન ઈન્કમ ટેક્સ અને રૂ. 34,470 કરોડનો પર્સનલ ઈન્કમ ટેક્સ સામેલ છે. સીધા વેરાની આવકમાં છેલ્લા ઘણા સમયથી વધારો થતો રહ્યો છે.

સેન્ટ્રલ બોર્ડ ઓફ ડાયરેક્ટ ટેક્સિસ દ્વારા શનિવારે જારી કરાયેલા ડેટા અનુસાર, 11 જુલાઈ, 2024 સુધીમાં રૂ. 5,74,357 કરોડના નેટ ડાયરેક્ટ ટેક્સ કલેક્શનમાં રૂ. 2,10,274 કરોડની કોર્પોરેટ ટેક્સ અને રૂ. 3,46,036 કરોડની પર્સનલ ઇન્કમ ટેક્સ સામેલ છે. . તે જ સમયે, સિક્યોરિટીઝ ટ્રાન્ઝેક્શન ટેક્સએ ડાયરેક્ટ ટેક્સ કલેક્શનમાં રૂ. 16,634 કરોડનું યોગદાન આપ્યું હતું.
ગયા વર્ષના સમાન સમયગાળામાં નેટ ડાયરેક્ટ ટેક્સ કલેક્શન 4,80,458 કરોડ રૂપિયા હતું. નાણાકીય વર્ષ 2024-25માં 11 જુલાઈ સુધી રૂ. 70,902 કરોડના રિફંડ પણ જારી કરવામાં આવ્યા છે, જે ગયા વર્ષના સમાન સમયગાળા દરમિયાન જારી કરાયેલા રિફંડ કરતાં 64.4 ટકા વધુ છે.
એપ્રિલ-જુલાઈ 11 દરમિયાન ડાયરેક્ટ ટેક્સની કુલ વસૂલાત (રિફંડ માટે એડજસ્ટમેન્ટ પહેલાં) 23.24 ટકાની વૃદ્ધિ દર્શાવે છે, જે અગાઉના વર્ષના સમાન ગાળામાં રૂ. 5.23 લાખ કરોડની સરખામણીએ રૂ. 6.45 લાખ કરોડ હતી.