બિહારના પટણામાં અપરાધખોરી ફાટી છે અને લોકો ડરેલા છે. રવિવારે અહીં ભાજપના નેતાની માથામાં ગોળી મારી હત્યા કરી દેવામાં આવી હતી. બાઈક સવાર અજાણ્યા બદમાશો આ ઘટનાને અંજામ આપ્યા બાદ ફરાર થઇ ગયા હતા. આ સમગ્ર ઘટના સીસીટીવી કેમેરામાં પણ કેદ થઇ હતી. પોલીસે ઘટનાસ્થળે પહોંચી વધુ તપાસ હાથ ધરી હતી.
આ સમગ્ર ઘટના ચોક થાના ક્ષેત્રની જણાવાઈ છે. રામદેવ મહતો સામુદાયિક ભવન નજીક ભાજપ નેતા શ્યામ સુંદર શર્મા ઉર્ફે મુન્ના શર્માને ગોળી મારવામાં આવી હતી. મુન્ના ભાજપના ચોકમંડળના પૂર્વ અધ્યક્ષ પણ રહી ચૂક્યા છે. પોલીસે આજુબાજુના વિસ્તારોના સીસીટીવી કેમેરાની મદદ લઈને આરોપીઓને પકડી પાડવા ચક્રો ગતિમાન કર્યા હતા.
મુન્ના શર્માના ઘરે કોઈ કાર્યક્રમ ચાલી રહ્યો હતો. સોમવારે સવારે પરિજનોને છોડવા તે રોડ પર આવ્યા હતા. તેમના ગળામાં સોનાની ચેઇન હતી. બદમાશોએ તે ઝૂંટવી લેવા પ્રયાસ કર્યો. આ દરમિયાન ઝપાઝપી થતાં બદમાશોએ તેમને ગોળી ધરબી દીધી હતી. ગોળી માથામાં વાગવાને કારણે એમનું મૃત્યુ થયું હતું.
બિહારના અનેક શહેરોમાં ગુનેગારો ખુલ્લેઆમ જેમ ફાવે તેમ ગુના આચરી રહ્યા છે અને શાંતિમાં પલીતો ચાંપી રહ્યા છે. બિહારમાં મહિલાઓની સલામતી પણ રહી નથી.
