યુપીમાં ધોળા દિવસે બૅન્કની કેશ વેન લૂટાઈ, ગાર્ડની હત્યા
ઉત્તર પ્રદેશના મિર્ઝાપુર શહેરમાં બેખૌફ બદમાશોએ આજે બપોરે ધોળા દિવસે મોટી ઘટનાને અંજામ આપ્યો હતો. કટરા પોલીસ સ્ટેશન વિસ્તારના બેલતર નજીક એક્સિસ બેંકના ATM કેશ વાનને લૂંટી હતી . વિરોધ કરી રહેલા ગાર્ડની ગોળી મારીને હત્યા કરી હતી .
ગોળી લાગવાથી 3 અન્ય લોકો ઘાયલ થયા હતા બે બાઈક પર સવાર ચાર બદમાશોએ આ ઘટનાને અંજામ આપ્યો હતો . તેઓ ફિલ્મી અંદાજમાં હથિયાર લહેરાવતા ફરાર થઈ ગયા હતા. આશરે રૂ. 22 લાખની લૂંટ થઈ હોવાનું પોલીસે જણાવ્યું હતું . ભીડભાડ વાળા વિસ્તારમાં ધોળા દિવસે ઘટેલી ઘટનાથી શહેરમાં સનસનાટી ફેલાઈ ગઈ હતી . અનેક પોલીસ સ્ટેશનની ફોર્સ સાથે વરિષ્ઠ અધિકારીઓ ઘટના સ્થળ પર પહોંચી ગયા હતા. આ મામલે તપાસ હાથ ધરવામાં આવી છે.
પ્રત્યક્ષદર્શીઓએ જણાવ્યું કે, કર્મચારીઓ કેશથી ભરેલું બોક્સ બેંકમાંથી લાવીને મૂકી રહ્યા હતા. આ દરમિયાન બે બાઈક પર સવાર ચાર લોકો વાન નજીક પહોંચ્યા. ચારેય લોકોએ હેલમેટ લગાવી રાખ્યું હતું. બાઈક પર પાછળ બેઠેલા બંને બદમાશોના હાથમાં હથિયાર હતા. બાઈક રોકતા જ ચારેય ઉતર્યા અને હવાઈ ફાયરિંગ શરૂ કરી દીધું. તેનાથી ત્યાં અફરા-તફરી મચી ગઈ હતી.
ગાર્ડે તેમને રોકવાનો પ્રયત્ન કર્યો તો તેને ગોળી મારી દીધી. ગોળી લાગતા જ ગાર્ડ જમીન પર ઢળી પડ્યો હતો . સારવાર દરમિયાન તેનું મોત થયું હતું.
