50 લાખની નકલી નોટો સાથે નવી મુંબઈમાંથી ગુજરાતના 2 લોકોની ધરપકડ
મહારાષ્ટ્રના નવી મુંબઈ પોલીસે બે લોકોની ધરપકડ કરી અને તેમની પાસેથી લગભગ 50 લાખ રૂપિયાની નકલી ચલણી નોટો જપ્ત કરી છે. એક અધિકારીએ શુક્રવારે આ જાણકારી આપી હતી. તેમણે જણાવ્યું કે બંને આરોપીઓ ગુજરાતના કચ્છ જિલ્લાના ભુજના રહેવાસી છે. ગુરૂવારે રાત્રે ગુપ્ત માહિતીના આધારે આરોપીઓની ધરપકડ કરવામાં આવી હતી અને તેમની પાસેથી એક લાખ રૂપિયાથી વધુની રોકડ પણ મળી આવી હતી.
અધિકારીએ કહ્યું, “માહિતી મળ્યા પછી નવી મુંબઈના ખારઘર પોલીસ સ્ટેશનની એક ટીમે બંનેને પકડી પાડ્યા છે. તેમની તલાશી દરમિયાન તેમની પાસેથી રૂ.500ની કુલ 9,981 નકલી નોટો મળી આવી હતી. તે નોટો પર કોઈપણ સીરીયલ નંબર વગર ‘ચિલ્ડ્રન બેંક ઓફ ઈન્ડિયા’ લખેલું હતું. તેને જપ્ત કરવામાં આવી છે. તેમણે કહ્યું, ‘જપ્ત કરાયેલી નોટો બિલકુલ અસલી જેવી જ દેખાતી હતી. આરોપીઓએ રૂ. 49,90,500ની આ નોટોને બજારમાં ચલાવવાની યોજના બનાવી હતી.
પોલીસ અધિકારીએ જણાવ્યું હતું કે ઉસ્માન દુશપ સાહા (40) અને અબ્દુલ હસન તુર્ક (41) નામના બે આરોપીઓ પાસેથી 1,09,500 રૂપિયા રોકડા પણ મળી આવ્યા હતા. પોલીસે જણાવ્યું હતું કે આરોપીઓ સામે ભારતીય દંડ સંહિતા (IPC)ની કલમ 420 (છેતરપિંડી), 489 (b) (અસલી, બનાવટી અથવા નકલી ચલણી નોટ અથવા બેંક-નોટ તરીકે ઉપયોગ કરીને) અને 34 (સામાન્ય હેતુ) હેઠળ કેસ નોંધવામાં આવ્યો છે.
