લે બોલ .. મમતા બેનર્જીને ભારતીય ક્રિકેટ ટીમની જર્સી સામે વાંધો ? શું કહ્યું , જુઓ
દરેક ચીજનું ભગવાકરણ થઈ રહ્યું છે તેમ કહી ભાજપ તરફ નિશાન તાક્યું
વોઇસ ઓફ ડે નવી દીલ્હી
અમદાવાદના નરેન્દ્ર મોદી સ્ટેડિયમમાં ભારત અને ઓસ્ટ્રેલિયા વચ્ચે વર્લ્ડ કપની ફાઈનલ મેચ રમાવાની છે. આ પહેલા ભારતીય ટીમની જર્સી પર રાજકારણ અને નેતાઓના નિવેદન શરુ થઇ ગયા હતા. પશ્ચિમ બંગાળના મુખ્યમંત્રી મમતા બેનર્જીએ ભારતીય ટીમની જર્સીને લઈને સવાલો ઉઠાવ્યા છે. મમતાએ ભાજપને નિશાન બનાવતા કહ્યું કે, દરેક વસ્તુને ભગવા રંગમાં રંગવામાં આવી રહી છે. આ નિવેદન પર ભાજપે પલટવાર કરતા કહ્યું કે મમતાએ આખા કોલકાતાને વાદળી અને સફેદ રંગમાં રંગી દીધું છે.
કોલકાતાના એક કાર્યક્રમ દરમિયાન મમતા બેનર્જીએ કહ્યું કે, હવે બધું ભગવા કલરનું થઇ રહ્યું છે! અમને આપણા ભારતીય ખેલાડી ઉપર ગર્વ છે અને મને વિશ્વાસ છે કે તેઓ વર્લ્ડ કપ જીતશે. પરંતુ પહેલા પ્રેક્ટિસ ખેલાડીઓ બ્લુ કલરની જર્સી પહેરતા જે હવે ભગવા કલરની થઇ ગઈ છે. મેટ્રો સ્ટેશનોને પણ ભગવા રંગે રંગવામાં આવી રહ્યા છે. આ સિવાય દરેક વસ્તુઓના નામ પણ નમો રાખવામાં આવી રહ્યા છે. આ અસ્વીકારીય વસ્તુ છે.
આ નિવેદન પછી ભાજપની પ્રતિક્રિયા સામે આવી હતી. બીજેપી નેતા શિશિર બજોરિયાએ કહ્યું, ‘અમે વર્લ્ડ કપ માટે ભારતીય ટીમની સારી બાબતોને આવકારીએ છીએ. જ્યારે તેઓ કહી રહ્યા છે કે ભારતીય ટીમનું ભગવાકારણ થઇ રહ્યું છે કારણ કે તેઓ પ્રેક્ટિસ દરમિયાન કેસરી કલરની જર્સી પહેરે છે,તો હું પૂછવા માંગીશ કે ત્રિરંગા વિશે શું જ્યાં કેસરી કલર ટોચ પર છે? આ ઉપરાંત તેમણે કહ્યું કે, સૂર્યના પ્રથમ કિરણનો રંગ કેવો હોય છે? આ રીતે તેમણે મમતા પર પલટવાર કર્યો હતો.
