ઇઝરાયલ દ્વારા લેબેનોન અને ગાઝામાં કેવા હુમલા થયા ? કેટલાના મોત ?
ઇઝરાયલ અને ઈરાન વચ્ચે લડાઈ હવે વધુ ખૂંખાર બને તેવી સંભાવના છે. રવિવારે ઇઝરાયલના મીડિયાએ એવા અહેવાલો આપ્યા હતા કે હવે ઇઝરાયલ દ્વારા ઇરાનના રાષ્ટ્રપતિ ભવન અને ખાસ કરીને તેલના કૂવાઓ પર મોટા હુમલા થવાની શક્યતા છે.
અહેવાલમાં એમ પણ જણાવાયું હતું કે ઇરાનના સુપ્રીમ લીડર ખામેનીના નિવાસસ્થાનના કેમ્પસમાં પણ ઇઝરાયલની સેના મોટા હુમલા કરી શકે છે. બીજી બાજુ ઈરાન પણ ઇઝરીલ સામે દરેક રીતે લડી લેવા તૈયાર હોવાનું કહ્યું છે. લેબેનોનમાં પણ હુમલા ચાલુ રહ્યા છે અને એવો દાવો થયો છે કે ઇઝરાયલ દ્વારા હિઝબુલ્લાહના 440 લડાકુઓને મારી નાખવામાં આવ્યા છે.
ગાઝાની મસ્જિદ-સ્કૂલ પર હુમલો : 24 ના મોત
દરમિયાનમાં ઇઝરાયલ દ્વારા લેબેનોન ઉપરાંત ગાઝામાં પણ એક સાથે હુમલા ચાલુ જ રાખવામાં આવ્યા હતા. રવિવારે એવા અહેવાલો બહાર આવ્યા હતા કે ઇઝરાયલ દ્વારા ગાઝામાં આવેલી એક મસ્જિદ પર અને એક સ્કૂલ પર બોમ્બ વર્ષા કરવામાં આવી હતી જેમાં 24 લોકોના મોત થઈ ગયા હતા અને તેમાં કેટલાક બાળકો અને મહિલાઓનો પણ સમાવેશ થાય છે.
બૈરૂતમાં રાતભર હવાઈ હુમલા : ચારેકોર કાટમાળ
લેબનોનમાં ઈઝરાયેલના હુમલા અને ગ્રાઉન્ડ ઓપરેશન વચ્ચે ઈઝરાયેલી સેનાએ શનિવારે રાત્રે બેરૂત એરપોર્ટ નજીક હવાઈ હુમલા કર્યા હતા. કેટલાક હુમલા એરપોર્ટ તરફ જતા રસ્તાઓ પર અને કેટલાક એરપોર્ટની દિવાલ પર થયા હતા. બૈરૂતમાં આખી રાત હવાઈ હુમલા થયા હતા અને 30 જેટલા હવાઈ અને ભૂમિ દળના હુમલા ચાલુ રહ્યા હતા.
હિઝબુલ્લાહના 440 સભ્યો માર્યા
ઇઝરાયેલી સંરક્ષણ દળે એવો દાવો કર્યો હતો કે તેણે હિઝબુલ્લાહના ઘણા કમાન્ડ સેન્ટરો, હથિયારોના ડેપો, ટનલ અને બેઝને નષ્ટ કરી દીધા છે. 30 સપ્ટેમ્બરે લેબનોનમાં ગ્રાઉન્ડ ઓપરેશન શરૂ થયા બાદ તેઓએ હિઝબુલ્લાહના 440 સભ્યોને મારી નાખ્યા છે.
ફ્રાન્સ સાથે ઇઝરાયલના મતભેદ
ઈઝરાયલના પીએમ બેન્જામિન નેતન્યાહુએ કહ્યું કે ફ્રાન્સ અમને સાથ ન આપે તો પણ અમે આ યુદ્ધ જીતી શકીએ છીએ. રાષ્ટ્રપતિ મેક્રોનને તેમના શબ્દો પર શરમ આવવી જોઈએ. વાસ્તવમાં, ફ્રાંસના રાષ્ટ્રપતિ ઇમેન્યુઅલ મેક્રોને 5 ઓક્ટોબરે કહ્યું હતું કે ઇઝરાયેલને ગાઝામાં લડવા માટે હથિયારો મોકલવા પર પ્રતિબંધ મૂકવો જોઈએ. આ પછી સમસ્યા હલ થવી જોઈએ.
નેતન્યાહુના નિવેદન બાદ મેક્રોનના કાર્યાલયે સ્પષ્ટતા આપી છે. તેમણે કહ્યું કે ફ્રાન્સ ઈઝરાયેલનું કટ્ટર મિત્ર છે. જો ઈરાન કે તેના પ્રોક્સીઓ હુમલો કરશે તો ફ્રાન્સ હંમેશા ઈઝરાયેલ સાથે ઉભું રહેશે.