ચીન દ્વારા ભારત વિરોધી શું પ્રવૃત્તિ થઈ રહી છે ? શું બહાર આવ્યું ? જુઓ

ચીનના ચાવવાના અને દેખાડવાના દાંત જુદા છે અને તેણે ભારત વિરોધી નીતિ યથાવત જ રાખી છે. ષડયંત્રો રચી ભારતની નિકટના વિસ્તારો પર કબજો જમાવવાનું ચાલુ રાખ્યું છે. ચીન ભૂતાનમા છેલ્લા આઠ વર્ષમાં 22 ગામો વસાવી ચૂક્યું છે. 2020 બાદ ચીને ડોકલામ પઠાર નજીક આઠ ગામો અને વસાહત વસાવી હોવાનું સેટેલાઇટ તસવીરો પરથી જાણવા મળ્યું છે. આમ ભારત માટે ચિંતા વધી છે. ભારત માટે વ્યૂહાત્મક રીતે ડોકલામ મહત્વનું છે. આ રીતે ભારતના ચિકન નેક ગણાતા સિલિગુડી કોરિડોરની સુરક્ષા પર સવાલો ઊભા થઈ શકે છે.

ભુતાનના પશ્ચિમી ક્ષેત્રમાં ડોકલામ નજીક આઠ ગામડાં પર ચીન પોતાનો અધિકાર દર્શાવી રહ્યો છે. જેમાં ઘણાં ગામમાં ચીનની સેનાની ચોકીઓ પણ આવેલી છે. આ 22 ગામમાં સૌથી મોટું ગામ જિવુ છે.

ઉત્તર-પૂર્વીય રાજ્યો માટે ખતરો
ચીન ભુતાન નજીક આવેલી સરહદો પર છેલ્લા આઠ વર્ષથી નવા ગામડાંઓ બનાવી વસાહત સ્થાપિત કરી રહ્યું છે. જે ભારત માટે ચિંતાનું મોટું કારણ બન્યું છે. ડોકલામમાં ચીનની સ્થિતિ મજબૂત બનતાં સિલિગુડી કોરિડોરની સુરક્ષા જોખમાય છે. આ કોરિડોર ભારતની મુખ્ય જમીનને ઉત્તર-પૂર્વીય રાજ્યો સાથે જોડે છે. આ સેટેલાઇટ તસવીરો અંગે હાલ વિદેશ મંત્રાલયે કોઈ પ્રતિક્રિયા આપી નથી.

૨૨૮૪ ઘર આવેલા છે
રોબર્ટ બાર્નેટ દ્વારા રજૂ રિપોર્ટ અનુસાર, ચીન દ્વારા 2016થી અતિક્રમણ થઈ રહ્યું હોવાનો દાવો કરવામાં આવ્યો છે. 2016માં ચીને ભુતાનના ક્ષેત્રમાં પ્રથમ ગામ સ્થાપિત કર્યું હતું. આજે 22 ગામ અને વસાહતો વસાવી છે. જેમાં 2284 ઘર છે અને 7000થી વધુ લોકો રહે છે.

સેટેલાઈટ તસ્વીરોથી દેખાય છે
હાલ છેલ્લાં કેટલાક વર્ષોથી ચીન દ્વારા ભુતાનની સરહદો પર બનાવવામાં આવેલા ગામડાંઓની સેટેલાઇટ તસવીરો હોવા છતાં ભુતાને ચીનની વસાહતનો ઇન્કાર કર્યો છે. 2023માં ભુતાનના પૂર્વ વડાપ્રધાન લોતે ત્શેરિંગે જણાવ્યું હતું કે, ભુતાનમાં ચીનના કોઈ ઠેકાણા નથી. આ વાત ખોટી છે.