વિદેશમાં સ્થાયી થવાનો ટ્રેન્ડ: એક વર્ષમાં જ ૫.૬ લાખ ભારતીયોએ દેશ છોડ્યો

દર વર્ષે હજારોની સંખ્યામાં ભારતીયો અમેરિકા, યુકે અને કેનેડા જેવા સમૃદ્ધ દેશો તરફ આકર્ષાય છે

ભારતીયોમાં વિદેશમાં સ્થાયી થવાનો ટ્રેન્ડ સતત વધી રહ્યો છે અને 2022માં 5.6 લાખ ભારતીયો OECD દેશોમાં માઈગ્રેટ થયા હોવાના આંકડા બહાર આવ્યા છે. આ ભારતીયો જે દેશોમાં ગયા છે તેમાં યુકે, યુએસ અને કેનેડા જેવા દેશો ટોચ પર છે જો કે, આ ત્રણેય દેશોમાં ઈમિગ્રેશનનો વિરોધ થઈ રહ્યો છે.

આ દેશો ઓર્ગેનાઈઝેશન ઓફ ઈકોનોમિક કોઓપરેશન એન્ડ ડેવલપમેન્ટ (OECD)નો ભાગ છે અને તેમણે ભારતીયો માટે દરવાજા ખોલ્યા છે. નવા ઈમિગ્રન્ટ્સ હોય કે પછી ઈન્ટરનેશનલ સ્ટુડન્ટ્સ તરીકે કે પછી સિટિઝનશિપ મેળવવાની હોય પરંતુ **OECD દેશોમાં ઈમિગ્રેશનમાં ભારતીયો ટોચ પર આવે છે. જોકે, હવે ભારતીયો માટે અમેરિકા, યુકે અને કેનેડા જેવા દેશોમાં માઈગ્રેટ કરવું મુશ્કેલ બની શકે છે, કેમ કે આ તમામ દેશોમાં ઈમિગ્રેશનનો વિરોધ થઈ રહ્યો છે અને તેના કારણે સરકાર દ્વારા તેને નિયંત્રણમાં લાવવાનો પ્રયાસો કરવામાં આવી રહ્યા છે.

જોકે, 2022નું વર્ષ ઐતિહાસિક રહ્યું અને તે વર્ષે 5.6 લાખ ભારતીયો OECD દેશોમાં ગયા હતા અને આ સંખ્યામાં તેના આગળના વર્ષ કરતાં 35 ટકાનો ઉછાળો નોંધાયો હતો. OECD દેશોમાં નવા માઈગ્રન્ટના સ્ત્રોત તરીકે ભારત ટોચ પર રહ્યું હતું જ્યારે 3.2 લાખ સાથે ચીન બીજા ક્રમે રહ્યું હતું. OECD દેશોમાં જેટલા પણ નવા ઈમિગ્રન્ટ્સ આવ્યા હતા તેમાં ભારતીયોનો હિસ્સો 6.4 ટકા રહ્યો હતો જ્યારે ચીનનો હિસ્સો 3.8 ટકા હતો. પરંતુ આમાં સૌથી ધ્યાન રશિયાએ ખેંચ્યું છે કેમ કે માઈગ્રેશનમાં રશિયન નાગરિકોની સંખ્યામાં પણ વધારો થયો છે. 2022માં 2.6 લાખ રશિયન નાગરિકો **OECD દેશોમાં માઈગ્રેટ થયા હતા. આ યાદીમાં રશિયા 18માં ક્રમે રહ્યું હતું.

ઈન્ટરનેશનલ માઈગ્રેશન આઉટલુક 2024માં આપવામાં આવેલી વિગતો અનુસાર, 2022માં યુકેએ 1.12 લાખ ભારતીયોને આવકાર્યા હતા અને આ આંકડો 2021 કરતા લગભગ ડબલ જેટલો છે. જ્યારે 1.25 લાખ ભારતીયોએ અમેરિકામાં સ્થળાંતર કર્યું હતું જે અગાઉના વર્ષ કરતાં 35 ટકાનો વધારો દર્શાવે છે. કેનેડામાં 1.18 લાખ ભારતીયોએ માઈગ્રેટ કર્યું હતું પરંતુ તે સંખ્યામાં ઘટાડો નોંધાયો હતો. અગાઉના વર્ષની સરખામણીમાં કેનેડા માઈગ્રેટ થનારા ભારતીયોની સંખ્યામાં આઠ ટકાનો ઘટાડો નોંધાયો હતો. આ દેશોમાં ભારતીયો મુખ્યત્વે લેબર પાથવે દ્વારા માઈગ્રેટ થાય છે. જેમાં ઘણીવાર મુખ્ય અરજદારો તરીકે અથવા પરિવારના સભ્યો સાથે માઈગ્રેટ થાય છે.

ચીનમાંથી પણ નોંધપાત્ર માઈગ્રેશન શરૂ થયું હતું. 2022માં OECD સભ્ય દેશોમાં ત્રણ લાખથી વધુ ચાઈનીઝ ઈમિગ્રન્ટ્સ ગયા હતા જે અગાઉના વર્ષ કરતાં 13 ટકા વધારે છે. ખાસ કરીને ચીનમાંથી અમેરિકામાં માઈગ્રેશનના પ્રવાહમાં 37 ટકાનો વધારો નોંધાયો છે. રશિયા અને રોમાનિયામાંથી પણ 2.7 લાખ નવા ઈમિગ્રન્ટ્સ **OECD દેશોમાં ગયા હતા. જ્યારે તુર્કિયે, ઈઝરાયલ અને જર્મની રશિયન ઈમિગ્રન્ટ્સ માટે પ્રાથમિક OECD સ્થળો તરીકે ઉભરી આવ્યા છે. બીજી તરફ રોમાનિયાના નાગરિકો મોટાભાગે જર્મની, સ્પેન અને ઈટાલી જેવા દેશોમાં ગયા હતા.

જોકે, હવે છેલ્લા ઘણા સમયથી પરિસ્થિતિ બદલાઈ ગઈ છે. એક સમયે ઈમિગ્રન્ટ્સને આવકારતું કેનેડા હવે ઈમિગ્રેશન પર આકરા નિયંત્રણો મૂકી રહ્યું છે. કેનેડામાં ઈમિગ્રેશનનો વિરોધ થઈ રહ્યો છે અને સરકાર પર પણ તેને નિયંત્રણમાં લાવવાનું દબાણ વધ્યું છે. જેથી કેનેડાએ આ વર્ષની શરૂઆતથી જ પોતાના વિઝા અને ઈમિગ્રેશનના નિયમોને કડક બનાવ્યા છે. તેવી જ સ્થિતિ યુકેમાં પણ જોવા મળી રહી છે. ટ્રમ્પ ઈલીગલ ઈમિગ્રેશનના તો કટ્ટર વિરોધી છે જ પરંતુ તેઓ લીગલ ઈમિગ્રેશનમાં પણ ઘટાડો કરવાની યોજના ધરાવે છે. તેવામાં આ દેશોમાં હવે ઈમિગ્રન્ટ્સની સંખ્યામાં ઘટાડો થાય તેવી શક્યતા વ્યક્ત કરવામાં આવી રહી છે.