લંડનમાં 11 દિવસ પહેલા ગુમ થયેલા કુશ પટેલનો મૃતદેહ મળ્યો, 9 મહિના પહેલા ગયો હતો UK

સ્ટૂડન્ટ વિઝા પર લંડન ગયેલો કુશ પટેલ ૨૦ ઓગસ્ટે ઈન્ડિયા પાછો આવવાનો હતો, પરંતુ તે પહેલા જ તે ૧૦ ઓગસ્ટની આસપાસ ગુમ થઈ ગયો હતો.. માતા-પિતાએ એકનો એક દીકરો ગુમાવ્યો

હજુ ગયા વર્ષે જ સ્ટૂડન્ટ વિઝા પર લંડન ગયેલા અમદાવાદના યુવક કુશ પટેલના ગુમ થયા બાદ હવે તેનો મૃતદેહ મળી આવ્યો છે. કુશ પટેલ ૧૦ ઓગસ્ટની આસપાસ કોઈને કંઈ કહ્યા વિના ચાલી ગયો હતો, તેની સાથે વાત ના થઈ શકતાં અમદાવાદના નવા નરોડા વિસ્તારમાં રહેતા તેના માતાપિતાએ કુશના મિત્રોને આ અંગે જાણ કરી હતી. જોકે, તેની શોધખોળ કર્યા બાદ પણ કુશનો પતો ના લાગતા આખરે આ મામલે વેમ્બલી પોલીસને જાણ કરવામાં આવી હતી. પોલીસે કુશ પટેલના મોબાઈલ ફોનના લાસ્ટ લોકેશન તેમજ સીસીટીવી ફુટેજને આધારે તેને શોધવાના પ્રયાસ કર્યા હતા. પોલીસ તપાસ દરમિયાન કુશ પટેલનો ફોન છેલ્લે લંડન બ્રિજની આસપાસ હોવાનું જાણવા મળ્યું હતું, બસ ત્યાર પછી તે બંધ થઈ ગયો હતો. પોલીસના અનેક પ્રયાસો બાદ ચારેક દિવસ પહેલા જ કુશનો પાર્થિવ દેહ થેમ્સ નદીમાંથી મળી આવ્યો હતો. કુશ ગુમ થયો ત્યારે તેના પિતાએ જણાવ્યું હતું કે તેમના દીકરાએ ૨૦ ઓગસ્ટે ઈન્ડિયા પરત આવવા માટે ટિકિટ બુક કરાવી લીધી હતી, એટલું જ નહીં કુશને કોઈ આર્થિક સંકડામણ ના હોવાનો પણ તેમણે દાવો કર્યો હતો.

કુશની બોડી ચારેક દિવસ પહેલા જ નદીમાંથી મળી ગઈ હતી, પરંતુ તે ઓળખાય તેવી સ્થિતિમાં ના હોવાથી પોલીસે પહેલા તો તેના ફિંગર પ્રિન્ટના આધારે ઓળખ કરવાનો પ્રયાસ કર્યો હતો, પરંતુ તેમાં પણ સફળતા ના મળતાં આખરે ડીએનએ મેચ થતાં તે બોડી કુશ પટેલની જ હોવાનું કન્ફર્મ કર્યું હતું. સૂત્રોનું માનીએ તો કુશ ગુમ થયો તે વખતે જ બીજો પણ એક યુવક આવી જ સ્થિતિમાં ગુમ થયો હોવાથી તેની બોડી મળી ત્યારે તે કુશની જ છે કે નહીં તે કોઈ કન્ફર્મ કરવાની સ્થિતિમાં નહોતું. કુશનું મોત કયા સંજોગોમાં થયું તેની કોઈ સત્તાવાર વિગતો હજુ સુધી બહાર નથી આવી શકી. જોકે, તે ગુમ થયો ત્યારે તે કોલેજ જતો ના હોવાથી તેને નોટિસ મોકલવામાં આવી હોવાની વાત બહાર આવી હતી. તેનો સંપર્ક કપાઈ ગયા બાદ તે લંડનમાં જ્યાં રહેતો હતો ત્યાં તેના અમુક મિત્રો તપાસ કરવા માટે પણ ગયા હતા, આ ઉપરાંત બીજી જગ્યાઓ પર પણ તેને શોધવામાં આવ્યો હતો, પરંતુ તેમાં સફળતા ના મળતા આખરે આ મામલો પોલીસ સુધી પહોંચ્યો હતો. પોલીસને કુશની બોડી ૧૯ ઓગસ્ટે મળી આવી હતી, પરંતુ તેની હાલત એવી હતી કે તેની ઓળખ થઈ શકે તેમ નહોતી.

માંડ ૧૯ વર્ષનો કુશ પટેલ હજુ નવેક મહિના પહેલા જ બિઝનેસ મેનેજમેન્ટનો અભ્યાસ કરવા માટે લંડન ગયો હતો. ભણવાની સાથે તે જોબ કરતો હોવાનું પણ જાણવા મળી રહ્યું છે, અને તે પોતાના અમદાવાદમાં રહેતા પરિવારને પણ આર્થિક મદદ કરતો હતો. જોકે, કોલેજમાં પુરતી હાજરી ના હોવાથી તેને નોટિસ મળતાં તેના સ્ટૂડન્ટ વિઝામાં પણ પ્રોબ્લેમ થાય તેવી શક્યતાઓ ઉભી થવાના કારણે તેણે વર્ક પરમિટ લેવા માટે પ્રયાસ કર્યા હતા, પરંતુ તેમાં સફળતા ના મળતા આખરે તે ૨૦ ઓગસ્ટે અમદાવાદ પરત આવી જવાનો હતો. જોકે, તે પહેલા જ તેનું મોત થયું હોવાના સમાચાર મળતાં કુશનો પરિવાર હાલ તો ભાંગી પડયો છે. પ્રાપ્ત વિગતો અનુસાર, તેના પરિવારની આર્થિક સ્થિતિ પણ સારી નથી, કુશને લંડન મોકલવામાં તેમણે મોટો ખર્ચો કર્યો હતો, ત્યારબાદ તેને વર્ક પરમિટ મળી જાય તે માટે તેમણે બીજો ખર્ચો કર્યો હતો પરંતુ તેમાં સફળતા નહોતી મળી.

ગુજરાતથી દર વર્ષે હજારો સ્ટૂડન્ટ્સ યુકે ભણવા માટે જાય છે, અને છેલ્લા કેટલાક સમયથી તો બારમું ધોરણ પાસ કરીને ગ્રેજ્યુએશનનો અભ્યાસ કરવા માટે વિદેશ જવાનું પ્રમાણ વધી રહ્યું છે, જેમાંથી યુકે પણ બાકાત નથી. જોકે, માંડ ૧૮-૧૯ વર્ષની ઉંમરે વિદેશ પહોંચી જતાં આ સ્ટૂડન્ટ્સને ત્યાં એડસ્ટ થવામાં ખૂબ જ તકલીફ વેઠવી પડે છે અને ઘણીવાર તો તેઓ નાસીપાસ પણ થઈ જતાં હોય છે. યુકેની જ વાત કરીએ તો હાલ ત્યાં ભણતા કે પછી કામ કરતા ગુજરાતીઓનું કહેવું છે કે અહીં કોસ્ટ ઓફ લિવિંગ મતલબ કે જીવનનિર્વાહનો ખર્ચો ખૂબ જ વધી ગયો છે, પરંતુ તેની સામે સ્ટૂડન્ટ વિઝા પર આવી નાની-મોટી નોકરીઓ કરતાં લોકોને મહિનાના ૧૦૦૦-૧૫૦૦ પાઉન્ડ કમાવવામાં પણ ફાંફા પડી જાય છે. એટલું જ નહીં, સ્ટૂડન્ટ્સની સ્થિતિનો લાભ ઉઠાવી તેમને નોકરીએ રાખનારા લોકો કેશમાં જોબ કરાવે છે અને મિનિમમ વેજથી અડધું વેતન ચૂકવે છે. યુકેના નિયમો અનુસાર, સ્ટૂડન્ટ્સ જો કોલેજ ચાલુ હોય તો સપ્તાહમાં ૨૦ કલાક અને વેકેશન દરમિયાન ફુલ ટાઈમ કામ કરી શકે છે. પરંતુ કોલેજની ફી ઉપરાંત રહેવા-જમવાનો ખર્ચો કાઢવાની સાાથે સ્ટૂડન્ટ્સ પર ઘરે પણ પૈસા મોકલવાનું દબાણ હોય છે અને તેઓ દિવસની ૧૦-૧૨ કલાક જોબ પણ કરતા હોય છે.