ઇરાન પર ઇઝરાયેલનો હુમલો

૨૬ દિવસે બદલો લીધો: ૧૦૦ લડાકુ વિમાન ત્રાટક્યા

પાટનગર તહેરાન નજીક ૨૦ લશ્કરી થાણા પર વહેલી સવારે એર સ્ટ્રાઇક

પોતાના તરફથી કાર્યવાહી પૂરી થઇ હોવાની ઇઝરાયેલની ઘોષણા: બદલો લેવાનો ધૂંધવાયેલા ઇરાનનો હૂંકાર

તા.૧ ઓક્ટોબરના રોજ ઇરાને ઇઝરાયેલ પર કરેલા મિસાઈલ એટેકના ૨૬ દિવસ બાદ ઇઝરાયેલે ઈરાનની ખો બોલાવી દે તેવો બદલો લીધો હતો. ૨૦૦૦ કિલોમીટરની ઉડાન ભરી ૧૦૦ ફાઈટર જેટ દ્વારા ઈરાનના ૨૦ કરતાં વધુ લશ્કરી થાણાઓ પર ઇઝરાયેલે બોમ્બમારો કરી ઈરાનને ધણધણાવી નાખ્યું હતું. ઇરાને જો કે આ હવાઈ હુમલાઓને નાકામ બનાવ્યો હોવાનો દાવો કરવાની સાથે જ થોડું નુકસાન થયું હોવાનું જણાવ્યું હતું.ઇઝરાયેલે પોતાનો હેતુ પાર પડ્યા હોવાનું અને પોતાના તરફથી કાર્યવાહી પૂરી થઈ હોવાનું જણાવ્યું હતું. બીજી તરફ ધૂંધવાયેલા ઇરાને જડબાતોડ જવાબ દેવાનો હુંકાર કર્યો હતો. સામા પક્ષે ઇઝરાયેલે ઈરાન જો સંઘર્ષ વધારવાનું દુ:સાહસ કરશે તો તેના ગંભીર પરિણામો ભોગવવા માટે તૈયાર રહેવાની ચેતવણી આપી હતી. ઉલ્લેખનીય છે કે હમાસ સાથે સંઘર્ષ શરૂ થયા બાદ ઇઝરાયેલે ઇરાન ઉપર સીધો હુમલો કર્યો હોય તેવી આ પ્રથમ ઘટના હતી. ઇઝરાયેલી સેનાએ ઈરાન અને તેના મળતીયાઓ દ્વારા ઈઝરાયેલ ઉપર થઈ રહેલા સતત હુમલાઓનો બદલો લેવા માટે આ હવાઈ હુમલા કરવામાં આવ્યા હોવાની જાહેરાત કરી હતી. શનિવારે વહેલી સવારે બે વાગ્યે ઇઝરાયેલે ઈરાનના પાટનગર તહેરાનઅને કરાજ નજીકના લશ્કરી થાણાઓ ઉપર ત્રણ વખત એર સ્ટ્રાઈક કરી હતી. હુમલાના પ્રથમ રાઉન્ડમાં જ તહેરાન નજીક વિસ્ફોટના ઓછામાં ઓછા સાત પ્રચંડ અવાજ સંભળાયા હતા. જો કે ઇઝરાયેલે ઈરાનના ઉર્જા અને પરમાણુ મથકોને નિશાન બનાવવાનું ટાળ્યું હતું. ઇઝરાયલના લડાકુ વિમાનોએ ઈરાનની મિસાઈલ મેન્યુફેક્ચરિગ ફેસીલીટીઝને નિશાન બનાવી હતી. ઓપરેશન પૂર્ણ કર્યા બાદ તમામ લડાકુ વિમાનો સલામત રીતે ઇઝરાયેલ પરત ફર્યા હતા.હુમલો થયો ત્યારે ઇઝરાયેલના વડાપ્રધાન બેન્જામિન નેતન્યાહુ અને રક્ષા મંત્રી યોઆવ ગેલેન્ટ તેલ અવિવ ખાતેના મિલિટરી હેડક્વાર્ટર માં ઉપસ્થિત રહ્યા હતા.

ઇઝરાયેલના હુમલાની અમેરિકાને જાણકારી આપવામાં આવી હતી
ઇરાન પર ત્રાટકતાં પહેલા ઇઝરાયેલે એ કાર્યવાહી અંગે અમેરિકાને જાણ કરી હતી. અમેરિકાએ ઇઝરાયેલ ના આ પગલાં ને સ્વરક્ષણ માટે કરવામાં આવેલી કાર્યવાહી ગણાવી હતી.જો કે આ હુમલામાં અમેરિકા સહભાગી ન હોવાનું વ્હાઇટ હાઉસના પ્રવક્તાએ જણાવ્યું હતું. ઇરાને કરેલા હુમલા અંગે પ્રમુખ જો બાઇડેનને પણ માહિતગાર કરવામાં આવ્યા હતા.