અમેરિકાએ ભારતના 21 વિદ્યાર્થીઓને એરપોર્ટ ઉપરથી જ ડિપોર્ટ કરી દીધા

ભારત પાછા આવેલા સ્ટૂડન્ટ્સે કર્યા ચોંકાવનારા આક્ષેપ, અમેરિકાના અધિકારીઓએ ફોન તેમજ વોટ્સએપ અને સોશિયલ મીડિયા પ્રોફાઈલ પણ ચેક કરી હતી

અમેરિકાએ એક જ દિવસમાં ૨૧ ભારતીય સ્ટૂડન્ટ્સને ડિપોર્ટ કરી દેતા આવનારા દિવસોમાં અમેરિકા જવાની તૈયારી કરી રહેલા ઘણા સ્ટૂડન્ટ્સમાં ફફડાટ ફેલાઈ ગયો છે. જે સ્ટૂડન્ટ્સને ડિપોર્ટ કરાયા તે તમામ તેલંગાણા તેમજ આંધ્રપ્રદેશના રહેવાસી હોવાનું જાણવા મળ્યું છે. આ તમામ સ્ટૂડન્ટ્સે વિઝા ફોર્માલિટી પૂરી કરી લીધી હતી તેમજ અમેરિકાની કોલેજો અને યુનિવર્સિટીમાં એડમિશન પણ લઈ લીધું હતું, પરંતુ એટલાન્ટા, શિકાગો અને સાનફ્રાંસિસ્કો એરપોર્ટ્સ પર તેમના ડોક્યુમેન્ટ્સ ચેક કર્યા બાદ આ તમામ સ્ટૂડન્ટ્સને ડિપોર્ટ કરવામાં આવ્યા હતા.

ડિપોર્ટ કરાયેલા સ્ટૂડન્ટ્સનો દાવો છે કે તેમણે વિઝા માટે જરૂરી તમામ પ્રોસેસ પૂરી કરી હતી, અને તેઓ અમેરિકા પહોંચ્યા બાદ થોડા જ દિવસોમાં કોલેજ જવાનું શરૂ કરવાના હતા. જોકે, તેમને ડિપોર્ટ કેમ કરાઈ રહ્યા છે તેની પૂરતી વિગતો તેમની સાથે શેર નહોતી કરાઈ. આ સ્ટૂડન્ટ્સને આશંકા છે કે તેમના વિઝા ડોક્યુમેન્ટ્સમાં કોઈ સમસ્યા થવાથી તેમને અમેરિકામાં એન્ટ્રી આપવામાં નહોતી આવી, એટલું જ નહીં ડિપોર્ટ થયેલા સ્ટૂડન્ટ્સનું એમ પણ કહેવું છે કે એરપોર્ટ પર તેમના ફોન અને વોટ્સએપ ચેટ પણ ચેક કરવામાં આવ્યા હતા.

આ તમામ સ્ટૂડન્ટ્સને ૧૨ થી ૧૬ ઓગસ્ટ દરમિયાન ડિપોર્ટ કરવામાં આવ્યા હતા, તેમણે અમેરિકામાં માસ્ટર્સ ડિગ્રીના કોર્સમાં એડમિશન લીધું હતું, પરંતુ વિઝા ડોક્યુમેન્ટેશન તેમજ અમુક બાબતોમાં સ્ટૂડન્ટ એક્સચેન્જ વિઝિટર પ્રોગ્રામના નિયમોનો ભંગ થયો હોવાનું બહાર આવતા તેમને અમેરિકાના એરપોર્ટ્સ પરથી જ ઈન્ડિયા મોકલી દેવાયા હતા. આ તમામ સ્ટૂડન્ટ્સ અમુક ડોક્યુમેન્ટ્સ ના હોવાથી તેમજ કાર્યવાહી પેન્ડિંગ હોવાથી શુક્રવારે દિલ્હી એરપોર્ટ પર ફસાયા હતા.

અમેરિકાના એરપોર્ટ પર તેમના મોબાઈલ ફોન ઉપરાંત, લેપટોપ અને સોશિયલ મીડિયા અકાઉન્ટ્સ ચેક કરવામાં આવ્યા હતા અને ત્યારબાદ તેમને ડિપોર્ટ કરાઈ રહ્યા હોવાની જાણ કરાઈ હતી. તેમને ઈન્ડિયામાં લીધેલા એજ્યુકેશન, વિઝા ઈન્ટરવ્યુ તેમજ કન્સલ્ટન્ટ્સ અંગે પણ સવાલ કરાયા હતા, અને બીજા દિવસે તેમને દિલ્હીની ફ્લાઈટમાં ના બેસાડાયા ત્યાં સુધી ડિટેઈન કરી રખાયા હતા. ડિપોર્ટ થયેલી એક યુવતીએ તો એવો પણ દાવો કર્યો હતો કે અમેરિકાના અધિકારીઓનું વર્તન ખૂબ જ ખરાબ હતું અને એમ્બેસી તેમજ યુનિવર્સિટીના ડોક્યુમેન્ટ્સ બતાવ્યા બાદ પણ તેઓ સ્ટૂડન્ટ્સના કોઈ સવાલોના જવાબ જ નહોતા આપી રહ્યા.

કેટલાક સ્ટૂડન્ટ્સનું એવું પણ કહેવું છે કે તેમને એરપોર્ટ પરથી જ શાંતિથી પોતાના દેશ પરત જતા રહેવાનું કહેવાયું હતું અને સાથે જ એવી ચેતવણી પણ અપાઈ હતી કે જો તેમણે કોઈ વાંધો ઉઠાવ્યો તો તેમની સામે કડક કાયદાકીય કાર્યવાહી કરવામાં આવશે. જે લોકોને ડિપોર્ટ કરી દેવાયા છે તેમાં મિસોરી અને સાઉથ ડકોટા સ્ટેટ્સની યુનિવર્સિટીમાં એડમિશન લેનારા સ્ટૂડન્ટ્સનો પણ સમાવેશ થાય છે. અમેરિકાની એક વેબસાઈટના જણાવ્યા અનુસાર, એરપોર્ટ પર જ રોકવામાં આવેલા આ સ્ટૂડન્ટ્સ સાથે તેમની તપાસ પૂરી થયા બાદ કોઈની સાથે કોઈ કોમ્યુનિકેશન પણ નહોતું કરાયું.

અખબાર ધ હિન્દુએ તો પોતાના અહેવાલમાં ત્યાં સુધી જણાવ્યું છે કે ડિપોર્ટ કરાયેલા સ્ટૂડન્ટ્સ પાંચ વર્ષ સુધી અમેરિકામાં એન્ટ્રી નહીં કરી શકે. આ સ્ટૂડન્ટ્સ સાથે જે થયું તેનાથી ન માત્ર તેમના સમય અને પૈસાનો વેડફાટ થયો છે, પરંતુ સાથે જ અમેરિકામાં ભણીને કરિયર બનાવવાની તેમની આશા પર પણ પાણી ફરી વળ્યું છે, ખાસ તો અમેરિકાએ તેમની એન્ટ્રી પર પાંચ વર્ષનો પ્રતિબંધ મૂકી દેતાં આ સ્ટૂડન્ટ્સ કફોડી સ્થિતિમાં આવી ગયા છે.

એક રિપોર્ટ અનુસાર, અમેરિકાએ કોરોનાકાળ બાદ ફોરેન સ્ટૂડન્ટ્સ માટે નવા વિઝા નિયમો લાગુ કર્યા છે, જેના કારણે હજારો ભારતીય સ્ટૂડન્ટ્સને ડિપોર્ટ થવાનો વારો આવે તેવી શક્યતા છે. અમરિકામાં હાલ બે લાખ ભારતીય સ્ટૂડન્ટ્સ ભણે છે, જેમાં હજારો ગુજરાતી સ્ટૂડન્ટ્સનો પણ સમાવેશ થાય છે. વિઝા નિયમોમાં જે ફેરફાર આવ્યા છે તે અનુસાર, અમેરિકામાં ઓનલાઈન એજ્યુકેશન આપતી યુનિવર્સિટી કે કોલેજોમાં એડમિશન લઈ સ્ટૂડન્ટ વિઝા લેનારા લોકોને તકલીફ પડી શકે છે. એક અંદાજ અનુસાર, કોરોનાને કારણે અમેરિકા ભણવા ગયેલા ૪૦-૫૦ ટકા જેટલા ભારતીય સ્ટૂડન્ટ્સ ઈન્ડિયા પાછા આવી ગયા છે.