અમેરિકામાં ૭.૨૫ લાખ ભારતીયો ગેરકાયદે રહે છે

2021માં અમેરિકામાં કુલ 1.05 કરોડ ગેરકાયદે ઈમિગ્રન્ટ્સ એટલે કે કુલ વસતીના ત્રણ ટકા જેટલા ગેરકાયદે લોકો હતા.

અમેરિકામાં ગેરકાયદે ઈમિગ્રેશન એક મોટી સમસ્યા બનતી જાય છે અને તેમાં ભારત સહિતના દેશો સૌથી આગળ છે. લેટેસ્ટ આંકડા પ્રમાણે અમેરિકામાં હાલમાં 7.25 લાખથી વધારે ભારતીયો ગેરકાયદે રીતે રહે છે. મેક્સિકો અને અલ સાલ્વાડોર પછી ભારતીયો અમેરિકામાં ઈલિગલ ઘૂસણખોરીમાં ત્રીજા ક્રમે છે. અમેરિકાએ મેક્સિકો બોર્ડર પર ઊંચી દિવાલ બનાવી છે છતાં ભારતીયો કેનેડાના રસ્તેથી અથવા મેક્સિકોના જંગલના રસ્તેથી અમેરિકામાં ઘૂસવાનું ચાલુ રાખે છે.

Pew રિસર્ચ સેન્ટરના અંદાજ પ્રમાણે છેલ્લા એક દાયકામાં અમેરિકામાં ભારતીય ઈલિગલ ઈમિગ્રન્ટની સંખ્યા વધીને હવે સવા સાત લાખને વટાવી ગઈ છે. 2021માં અમેરિકામાં કુલ 1.05 કરોડ ગેરકાયદે ઈમિગ્રન્ટ્સ હતા. એટલે કે અમેરિકાની કુલ વસતીના ત્રણ ટકા જેટલા ગેરકાયદે લોકો હતા. અમેરિકામાં વિદેશી મૂળના લોકોને ગણવામાં આવે તો કુલ 22 ટકા લોકો ઈલિગલી રહે છે.

અમેરિકામાં વર્ષ 2007થી 2021ના આંકડાનો અભ્યાસ દર્શાવે છે કે વિશ્વના લગભગ દરેક ભાગમાંથી લોકો અહીં આવી રહ્યા છે જેમાં ગેરકાયદે લોકો પણ મોટી સંખ્યામાં છે. યુએસમાં સૌથી વધુ ગેરકાયદે ઈમિગ્રન્ટ સેન્ટ્રલ અમેરિકામાંથી અને સાઉથ-ઈસ્ટ એશિયામાંથી આવે છે. સેન્ટ્રલ એશિયામાંથી આવેલા ઈમિગ્રન્ટ્સની સંખ્યામાં 2.40 લાખનો વધારો થયો છે જ્યારે સાઉથ ઈસ્ટ એશિયામાંથી 1.80 લાખ નવા લોકો યુએસમાં ગેરકાયદેસર રીતે આવ્યા છે.

અમેરિકામાં ગેરકાયદે ઈમિગ્રન્ટ તરીકે આવતા ટોચના ત્રણ દેશોમાં મેક્સિકો, અલ સાલ્વાડોર અને ભારતનો સમાવેશ થાય છે. ત્યાર બાદ બ્રાઝિલ અને ભૂતપૂર્વ સોવિયેત યુનિયનના દેશોનો વારો આવે છે. વર્ષ 2021ના આંકડા પ્રમાણે અમેરિકામાં મેક્સિકોના 41 લાખ લોકો ગેરકાયદે રહેતા હતા. જ્યારે અલ સાલ્વાડોરના લોકોની સંખ્યા આઠ લાખ અને ભારતીયોની સંખ્યા 7.25 લાખથી વધારે હતી.

કયા રાજ્યમાં સૌથી વધુ ગેરકાયદે ઈમિગ્રન્ટ વસે છે.

અમેરિકામાં ઘૂસણખોરી કરતા ઈમિગ્રન્ટ્સમાં કેલિફોર્નિયા ફેવરિટ છે. કેલિફોર્નિયામાં 19 લાખ લોકો ગેરકાયદે વસવાટ કરે છે. જ્યારે ટેક્સાસમાં 16 લાખ, ફ્લોરિડામાં 9 લાખ, ન્યૂ યોર્કમાં છ લાખ, ન્યૂ જર્સીમાં 4.50 લાખ અને એલિનોઈસમાં ચાર લાખ ઈલિગલ ઈમિગ્રન્ટ્સ વસવાટ કરે છે.

અમેરિકામાં ગેરકાયદે ઈમિગ્રેશનને રોકવા માટે પ્રયાસો થતા હોવા છતાં અસલમાં તેની સંખ્યા વધતી જાય છે. વર્ષ 2017માં અહીં 55 લાખ ગેરકાયદો લોકો વસતા હતા. ત્યાર પછી ચાર વર્ષમાં તેમાં નવ લાખનો વધારો થયો અને 2021માં ગેરકાયદે ઈમિગ્રન્ટની સંખ્યા વધીને 64 લાખ થઈ હતી. સૌથી વધુ ગેરકાયદે ઈમિગ્રન્ટ મોકલવામાં ગ્વાટેમાલા (સાત લાખ) અને હોન્ડુરસ 5.25 લાખ)નો પણ સમાવેશ થાય છે. તેના કારણે અમેરિકામાં ઇલિગલ રીતે પહોંચેલા લોકોની કુલ સંખ્યા 1.05 કરોડ થઈ હતી.

યુરોપ અને બીજા કેટલાક ધનિક વિસ્તારોને બાદ કરવામાં આવે તો દુનિયાના દરેક ભાગમાંથી લોકો અમેરિકા આવી રહ્યા છે જેમાં ગેરકાયદે ઘૂસતા લોકોની સંખ્યા પણ મોટી છે. અમેરિકામાં સેન્ટ્રલ અમેરિકા, કેરેબિયન, સાઉથ અમેરિકા, એશિયા, યુરોપ અને સબ-સહારન આફ્રિકાના લોકોની સંખ્યા વધી છે.