તો બૈરુતને પણ ગાઝા બનાવી દેશું: નેતન્યાહુ
હેઝબોલ્લાહને ઇઝરાયેલની ધારદાર ધમકી
ઇઝરાયેલ અને હમાસ વચ્ચેના યુદ્ધ દરમિયાન દક્ષિણ લેબેનોનમાંથી હેઝબોલ્લાહ દ્વારા થઈ રહેલા હુમલા સામે ચેતવણી આપતા ઇઝરાયેલના વડાપ્રધાન બેન્જામિન નેતન્યાહુએ જો હેઝબોલ્લાહ સાનમાં નહીં સમજે તો બૈરુતની હાલત પણ ગાઝા અને ખાન યુનિસ જેવી કરી નાખવાની ધમકી આપી હતી.
લેબેનોન સરહદ પર હેઝબોલ્લાહ સામે લડતા સૈનિકો સાથેની મુલાકાત દરમિયાન તેમણે કહ્યું કે જો હેઝબોલ્લાહ ઇઝરાયેલ સામે ખુલ્લુ યુદ્ધ લડવાની હિંમત કરશે તો બૈરુત અને દક્ષિણ લેબેનોન પણ ગાઝા અને ખાન યુનિસ શહેરની જેમ ખંડેરમાં ફેરવાઈ જશે અને તેની સઘળી જવાબદારી હેઝબોલ્લાહની રહેશે.
એ દરમિયાન યુદ્ધ વિસ્તરે નહીં તે માટે અમેરિકાના પ્રમુખ જો બાઇડેને નેતન્યાહુ તથા જોર્ડનના કિંગ અબ્દુલ્લા દ્વિતીય સાથે વાત કરી હતી. નોંધનીયછે કે સાતમી ઓક્ટોબરે યુદ્ધ શરૂ થયું ત્યારથી લેબેનોનમાંથી હેઝબોલ્લાહના લડાકુઓ દ્વારા ઈઝરાયેલ ઉપર રોકેટ અને મિસાઈલ હુમલા અવિરત જારી રહ્યા છે. ગુરુવારે પણ હેઝબોલ્લાહે કરેલા એન્ટી ટેન્ક મિસાઈલ હુમલામાં બે ઇઝરાયેલી સૈનિકો ઘાયલ થયા હતા.