ધુળેટી માણો પણ આંખ અને સ્કીનનું ધ્યાન રાખીને…..

યુવાવર્ગ કેસૂડાં તથા અબીલ ગુલાલ જેવા કુદરતી રંગો ને ભૂલી ને ત્વચા ને હાનિકારક એવા સિન્થેટિક રંગોનો ઉપયોગ કરે છે

નાના બાળકોથી લઈને મોટાઓ સુધી બધા આતુરતાથી હોળીના પર્વની રાહ જોઈ રહ્યા છે. આગામી 24 માર્ચે હોળી અને 25 માર્ચે ધૂળેટીની ઉજવણી કરવામાં આવનાર છે. ધૂળેટીના દિવસે રંગોથી રમવામાં આવે છે. આ દિવસે લોકો એકબીજાને રંગો લગાવીને પોતાની ખુશી અને પ્રેમ વ્યક્ત કરે છે.

હોળી અને ધુળેટી એટલે રંગો નો તહેવાર. સમગ્ર ભારત માં હોળી – ધુળેટી ને રંગો થી આનંદ સાથે ઉજવવામાં આવે છે. આજના વર્તમાન સમય માં યુવાવર્ગ કેસૂડાં તથા અબીલ ગુલાલ જેવા કુદરતી રંગો ને ભૂલી ને ત્વચા ને હાનિકારક એવા સિન્થેટિક રંગોનો બેફામ ઉપયોગ કરવા લાગ્યા છે. જેના કારણે ત્વચા તેમજ આંખને નુકસાન થવાનું પ્રમાણ ખુબજ વધી ગયું છે. તો આવા સંજોગો માં ધુળેટી ના રંગો નો આનંદ પણ માણવો અને ત્વચા , વાળ તથા આંખને નુકસાન પણ ના થાય તેનું ધ્યાન કઈ રીતે રાખવું તે વિષે આપણે રાજકોટના સ્કીન સ્પેશ્યલિસ્ટ ડો ભાવેશ દેવાણી,આંખના ડો મનીષા દેવાણી તથા ડો. દ્રષ્ટી દેવાણી (DDV સ્કીન સ્પેશીયાલીસ્ટ) પાસેથી થોડી માહિતી મેળવીએ .

  વર્તમાન સમય માં પર્યાવરણ માં આવેલી જાગૃકતા ને કારણે બિનહાનિકારક , ઇકોફ્રેન્ડલી, કુદરતી રંગો કે જે ફૂલોના તેમજ પાંદડાંના રસ માંથી તથા સુખડ માંથી બનાવામાં આવે છે તે મળવા લાગ્યા છે. અને જાગૃત લોકો તેને વાપરે પણ છે. આવા રંગો ઘરે પણ બનાવી શકાય છે.

કુદરતી રંગો: સુખડ નો પાવડર, અબીલ, ગુલાલ, હળદર, કેસુડો, મેંહદી વિગેરે -સિન્થેટિક રંગો: લેડ ઑક્ષાઇડ (બ્લેક) ,આયોડીન (બ્રાઉન), એન્જિન ઓઇલ (ગ્રીન) ,કોપર સલ્ફેટ (ગ્રીન) ,મરક્યુરી સલ્ફેટ (રેડ) ,પર્સીયન બ્લુ (બ્લુ) . રંગ વધુ પ્રમાણ માં બને તેમજ લાંબો સમય તેની અસર રહે તે માટે ઉપર દર્શાવેલ સિન્થેટિક રંગ નો ઉપયોગ કરવા માં આવે છે. જેમાં ત્વચા તેમજ આંખને હાનિકર્તા તત્વો રહેલા હોય છે. જેનો ઉપયોગ કરવાથી ત્વચા માં બળતરા , એલર્જી , ખંજવાળ,લાલ ચકામાં થવાની શક્યતા રહેલી છે. તેમજ આંખમાં બળતરા થવી, ખટકો આવવો, આંખમાં થી પાણી પડવા,જેવી તકલીફ થાય છે. ભેળસેળયુક્ત ગુલાલ તેમજ અબીલ કે જેમાં રંગો ને ચમકીલા બનાવવા માટે microdust ઉમેરવા માં આવે છે જેના કારણે ત્વચા પર ઉઝરડા થાય છે જેમાં રંગ ભળવાથી ત્વચા ને ચેપ પણ લાગી શકે. જે વ્યક્તિને એલર્જી હોય તેઓને ધુળેટી રમ્યાના થોડા દિવસ પછી પણ સૂકી ત્વચા તથા ખંજવાળ અને નાની ફોલ્લીઓ થઇ શકે છે. આ પ્રકાર ના રંગો વાળ માં લાગવા થી વાળ રુક્ષ તેમજ સૂકા થઇ જાય છે. વાળ માં લાગેલ પાક રંગો ને દૂર કરવા વારંવાર શેમ્પૂ કરવાથી તેમજ વધુ ગરમ પાણીથી વાળ ધોવાથી વાળને વધુ નુકસાન થાય છે.

ધુળેટી રમતી વખતે આટલું ખાસ ધ્યાન રાખવું

ધુળેટી માં રમવા નીકળતા પહેલા ત્વચા ઉપર snscreen તથા moisturiser બરાબર લગાડવું.
વાળમાં કોપરેલ તેલનું માલિશ કરી વાળ ને બાંધી દેવા.
આંખને સંપૂર્ણ કવર કરે તેવા સુનગ્લાસ પહેરવા.
જાડા સુતરાવ કપડાં પહેરવા.
કુદરતી તેમજ ભેળસેળ વિનાના રંગોથીજ રમવાનો આગ્રહ રાખવો. કેસુડાના ફૂલોને એક દિવસ પાણીમાં પલાળીને તેમાંથી બનતા રંગ નો ઉપયોગ કરવો.
હોઠ પર લિપબામ લગાડવો, નખ કાપેલા રાખવા, તથા પાકો નેઇલ પેન્ટ લગાડવો.
બાળકોને વડીલોના માર્ગદર્શન હેઠળજ રંગોથી રમાડવા.
રંગોથી રમ્યા પછી સૌપ્રથમ બધોજ ડ્રાય પાવડર ખાંખેરી ને દૂર કરવો , ત્યારબાદ હૂંફાળા ગરમ પાણી થી નહાવું તેમજ neutral ph ધરાવતા સાબુનો ઉપયોગ કરવો.
રંગ દૂર કરવા સ્ક્રબર નો ઉપયોગ ના કરવો તેમજ ત્વચા ને બહુ ઘસવી નહિ.
વાળને હળવા શેમ્પૂથી ધોવા તથા કન્ડિશનર કરવું તથા થોડા દિવસો સુધી તેલ માલીસ કરવું.

આ બધી કાળજી લીધા પછી પણ જો બળતરા રહે, ત્વચા રફ થઇ જાય,લાલ ચકામાં થાય,આંખમાં બળતરા થાય, આંખ ના સર્જન તેમજ સ્કીન ના સ્પેશ્યલિસ્ટ ને બતાવી તેમનો અભિપ્રાય લઇ લેવો હિતાવહ છે.

વાળનું ધ્યાન કેવી રીતે રાખવું

રંગોમાં હાજર રસાયણો વાળને શુષ્ક અને નિર્જીવ બનાવી શકે છે. એક્સપર્ટ્સ વાળની સુરક્ષા માટે નારિયેળ તેલ અથવા અન્ય કોઈપણ હેર ઓઈલનો પાતળો પડ લગાવવાની સલાહ આપે છે, જેથી રંગ વાળના સીધા સંપર્કમાં ન આવે. હોળી રમ્યા પછી વાળને હળવા શેમ્પૂ અને સાબુથી સારી રીતે સાફ કરો.
હોળી રમતી વખતે અને પછી પૂરતું પાણી પીઓ જેથી ત્વચા હાઇડ્રેટ રહે.