મગજ ફરી જશે: મિર્ઝાપૂર-3ની તારીખ જણાવવા નિર્માતાએ કાઢ્યો અનોખો રસ્તો
કોમિક તસવીર શેર કરી કહ્યું, તારીખ પૂછતાં નહી, શોધવાનું શરૂ કરો
પ્રાઇમ વિડીયો પોતાના ફેન્સ અને વ્યૂવર્સ સાથે રમત રમી રહ્યા છે. રમત છે તારીખ પે તારીખ. પહેલા પંચાયત-3ની રિલીઝ ડેટની જાહેરાત સમયે દૂધી હટાવવાની રમત રમાડી અને હવે મિર્ઝાપૂર-3ની રિલીઝ ડેટ જણાવવા માટે પણ નવી રમત લઈને આવી ગયા છે એક નવા પોસ્ટર સાથે. આ પોસ્ટરમાં જ તારીખ છુપાયેલી છે જેને જાણવા માટે તમારે મગજ દોડાવવું પડશે.
મિર્ઝાપૂર-3ની રિલીઝ ડેટને લઈને નિર્માતાએ લાંબા સમયથી સસ્પેન્સ બનાવી રાખ્યું છે. ઓટીટી પ્લેટફોર્મ પ્રાઇમ વિડીયોએ ઇન્સ્ટાગ્રામ પર એક કોમિક તસવીર શેર કરી છે. જેમાં કાલીન ભૈયા થી લઈને ગુડ્ડુ ભૈયા અને મુન્ના ભૈયા સુધીના પાત્રો કોમિક અવતારમાં જોવા મળે છે. આ તસવીરમાં દેખાતા તમામ પાત્રો ઘાયલ અવસ્થામાં જોવા મળે છે. જમીન પર લોહી વહી રહ્યું છે, બંદૂક અને કારતૂસ પડી છે. તસવીર શેર કરીને લખવામાં આવ્યું છે કે, “હવે મિર્ઝાપૂર-3ની રિલીઝ ડેટ વિશે પૂછતાં નહી, શોધવાનું છે. તો શરૂ થઈ જાવ”.
આ પોસ્ટર સામે આવ્યા બાદ લોકોએ પણ પ્રતિક્રિયા આપવાનું શરૂ કર્યું છે. દર્શકોએ પોત-પોતાની રીતે મગજ દોડાવવાનું શરૂ કર્યું છે. એક યુઝરે કોમેન્ટ કરી છે અને લખ્યું છે, 7 કાર્પેટ, 7 કારતૂસ, 7 લોકો= 7 જુલાઇ. તો બીજા યુઝરે લખ્યું છે, 7 કાર્પેટ, 5 પિસ્ટલ એટલે 5 જુલાઇએ આ સિરીઝ આવશે. તો વળી અન્ય એક યુઝરે લખ્યું છે કે, લાગે છે કે, મિર્ઝાપૂર જઈને જ તપાસ કરવી પડશે.
