digital arrest સામે સુરક્ષા આપશે WhatsApp : વિડીયો કોલ આવશે તો મળશે આ સુવિધા, જાણો શું છે ખાસ

‘ડિજિટલ એરેસ્ટ’ના કિસ્સાઓએ માત્ર સામાન્ય લોકોને જ પરેશાન કર્યા નથી, સરકાર પણ તેનાથી ચિંતિત છે. છેલ્લા કેટલાક મહિનાઓમાં, ડિજિટલ એરેસ્ટ’ કરનારાઓ સામે શ્રેણીબદ્ધ કાર્યવાહી કરવામાં આવી છે. અહેવાલો અનુસાર, સરકારે કહ્યું છે કે ભારતીય સાયબર ક્રાઇમ કોઓર્ડિનેશન સેન્ટરે 3,962 થી વધુ સ્કાયપે આઈડી અને 83,668 વોટ્સએપ એકાઉન્ટ બ્લોક કર્યા છે. ત્યારે આને પગલે વોટ્સએપમાં એક ફીચર આવશે જે તમને ડિજિટલ અરેસ્ટથી બચાવશે.  હાલમાં નવા ફીચર પર કામ કરવામાં આવી રહ્યું છે. આ ફીચરની મદદથી ‘ડિજીટલ એરેસ્ટ’ સામે પ્રોટેક્શન મળી રહેશે. 

શું છે આ નવું ફીચર?

વોટ્સએપ પોતાના યુઝર્સને આકર્ષિત કરવા માટે સમયાંતરે નવા-નવા ફીચર્સ એડ કરતું હોય છે ત્યારે હાલ વોટ્સએપ દ્વારા હાલમાં જે ફીચર પર કામ કરવામાં આવી રહ્યું છે તેનું નામ ‘ટર્ન ઓફ યોર વીડિયો’ છે. યુઝરને જ્યારે પણ વીડિયો કોલ આવે ત્યારે તે તેને રિસીવ તો કરી શકે છે, પરંતુ કેમેરા બંધ રાખીને. એટલે કે યુઝર વીડિયો કોલને ઓડિયો કોલની રીતે ઉઠાવી શકશે. આથી સામેની વ્યક્તિ યુઝરનો ચહેરો જોઈ શકશે નહીં. જો કેમેરા પહેલેથી બંધ હશે, તો યુઝરને ‘એક્સેપ્ટ વિથાઉટ વીડિયો’ એ વિકલ્પ આપવામાં આવશે. સાથે જ, એકવાર ફોન ઉઠાવ્યા બાદ, એમાં વીડિયો ફરી ચાલુ કરવો હોય તો તે પણ શક્ય થશે.

ડિજીટલ એરેસ્ટ સામે પ્રોટેક્શન

ડિજિટલ મીડિયા અને ટેકનોલોજીનો યુગ જેમ-જેમ આગળ વધી રહ્યો છે તેમ સાયબર ગઠિયાઓ દ્વારા પણ લોકોને છેતરવા માટે ડીજીટલી અલગ-અલગ કિમિયા અપનાવવામાં આવતા હોય છે ત્યારે વોટ્સએપનું આ ફીચર ‘ડિજીટલ એરેસ્ટ’ સામે પ્રોટેક્શન આપશે. ‘ડિજીટલ એરેસ્ટ’માં વ્યક્તિને કેમેરા સામે બેસાડી રાખવામાં આવે છે અને જ્યાં સુધી પૈસા ન મોકલવામાં આવે ત્યાં સુધી તેઓને ઉઠવા દેવામાં નથી આવતા. આ ફીચરમાં કેમેરા પહેલેથી બંધ હોવાથી સ્કેમર્સ યુઝરને એકવાર પણ જોઈ શકતા નથી. જો યુઝર કેમેરા સામે ન હોય, તો તેમને ડરાવી ધમકાવીને તેમની પાસેથી પૈસા પડાવવાની તક સ્કેમર્સને નથી મળતી. તેઓ સરકારી કર્મચારી બનીને લોકો પાસેથી ઓનલાઈન પૈસા ટ્રાન્સફર કરાવે છે.

અન્ય એપ્લિકેશનમાં પહેલેથી છે આ ફીચર

વોટ્સએપ પર અત્યાર સુધી વીડિયો કોલ ઉઠાવ્યા બાદ જ કેમેરા બંધ કરવાનું ફીચર ઉપલબ્ધ હતું. જોકે હવે આ ફીચર પહેલેથી જ ઉપલબ્ધ છે. વિવિધ વીડિયો કોન્ફરન્સ પ્લેટફોર્મ્સ જેમ કે Google Meet અને Microsoft Teams દ્વારા આ ફીચર પહેલેથી જ આપવામાં આવી રહ્યું છે. યુઝર કેમેરા શરૂ કર્યા વગર પણ ફોન ઉઠાવી શકે છે.

અન્ય ફીચરનો પણ સમાવેશ કરવામાં આવશે

વોટ્સએપ હવે કેમેરા ફીચર સાથે UPI Lite પર પણ કામ કરી રહ્યું છે. આ ફીચરમાં યુઝર પિન દાખલ કર્યા વગર પેમેન્ટ કરી શકશે. વધુમાં, મોટાભાગની ઑનલાઈન પેમેન્ટ એપ્લિકેશન્સમાં આ ફીચર પહેલેથી જ ઉપલબ્ધ છે. જોકે વોટ્સએપમાં હજી સુધી તે ઉમેરાયેલું નથી, તેથી હવે તેમાં પણ તેનો સમાવેશ કરવામાં આવી રહ્યો છે. આ ઉપરાંત Meta AIના ઇન્ટરફેસમાં બદલાવ લાવવાના પણ પ્રયત્નો થઈ રહ્યા છે, જેમાં યુઝર્સને ઓટોમેટિક સજેશન્સ મળશે.