પોલીસ હોય તો શું થયું? અહીં આવવાની મનાઈ છે કહી શખ્સે પોલીસ સાથે ગાળાગાળી-ઝપાઝપી કરી

રાજકોટમાં હવે તો પોલીસ પણ સલામત ન હોવાનું એક નહીં બલ્કે અનેક વખત બની ચૂક્યું છે. પોલીસ ઉપર હુમલા, ગાળાગાળી સહિતના બનાવો બની રહ્યા છે તેમાં વધુ એકનો ઉમેરો થવા પામ્યો છે. એક કોન્સ્ટેબલ ગુનેગારોને ચેક કરવા માટે વિસ્તારમાં ગયા ત્યારે એક શખ્સે ધસી આવીને પોલીસ હોય તો શું થયું? અહીં આવવાની જ મનાઈ છે’ તેમ કહી ગાળાગાળી-ઝપાઝપી કરતાં કોન્સ્ટેબલની ફરિયાદના આધારે બી-ડિવિઝન પોલીસે ગુનો નોંધી આરોપીની આગવીઢબે સરભરા કરી કાયદાનું ભાન કરાવ્યું હતું.

આ અંગે બી-ડિવિઝન પોલીસ મથકમાં ફરજ બજાવતાં કોન્સ્ટેબલ અજય વિઠ્ઠલભાઈ ચૌહાણે નોંધાવેલી ફરિયાદમાં જણાવ્યું કે રવિવારે બી-ડિવિઝન પોલીસ મથક વિસ્તારમાં રહેતા એમસીઆર કાર્ડવાળા લોકોને ચેક કરવાની કામગીરીમાં હતા તે દરમિયાન સલીમ ઉર્ફે સલુબાપુ હનીફશા શાહમદારને ભગવતીપરા શેરી નં.14માં ચેક કરવા માટે તેના ઘરનું સરનામું શોધી રહ્યા હતા. દરમિયાન 12:05 વાગ્યે ભગવતીપરા મોર્ડન સ્કૂલની સામે આવેલી વિનોબા ભાવે આવાસ યોજનાના ક્વાર્ટરથી ભગવતીપરા બાજુ જતાં રસ્તે ઉભા હતા ત્યારે એક શખ્સે આવીને તમે કોણ છો ? અહીં કેમ આવ્યા છો ? એવું પૂછતાં અજયે પોતે પોલીસ હોવાની ઓળખ આપી હતી. આ પછી સામેવાળા શખ્સે તેનું નામ રફીક હોવાનું કહી પોલીસ હોય તો શું થઈ ગયું. આ માટે વિસ્તાર આવવાની હિંમત કેમ કરી ? કહી ગાળો ભાંડવા લાગ્યો હતો.

આટલું ઓછું હોય તેમ પોલીસવાળાને બહુ ચરબી આવી ગઈ છે કહી ઝપાઝપી કરવા લાગતાં પોલીસ કંટ્રોલરૂમમાં જાણ કરી હતી. જો કે તે પહેલાં રફીક રવાના થઈ ગયો હતો પરંતુ જતાં જતાં આજે તો જવા દીધો છે હવે પછી આ વિસ્તારમાં આવીશ તો જીવતો નહીં જવા દઉં તેવી ધમકી પણ આપી હતી. પોલીસે તપાસ કરતાં માથાકૂટ કરનાર શખ્સનું નામ રફીક પઠાણ હોવાનું ધ્યાન પર આવ્યું હતું.