ભાજપે રાહુલ ગાંધી સામે કરી બીજી ફરિયાદ શું થયું ? વાંચો

ભાજપ કોંગ્રેસના નેતા રાહુલ ગાંધીની મુશ્કેલી વધારવા માટે મક્કમ દેખાય છે. પનોતી શબ્દ બદલ રાહુલ સામે કાર્યવાહી શરૂ કરાવ્યા બાદ હવે ભાજપે ચૂંટણી પંચને પત્ર લખીને ફરિયાદ કરી છે કે રાજસ્થાનમાં મતદાન દરમિયાન કોંગ્રેસના સ્ટાર પ્રચારક રાહુલ ગાંધીએ આચાર સંહિતાનું ઉલ્લંઘન કર્યું હતું. રાહુલનું એકાઉન્ટ સસ્પેન્ડ કરાવવાની માંગણી પણ કરવામાં આવી છે.

ભાજપે આરોપ લગાવતા કહ્યું કે, સોશિયલ મીડિયા હેન્ડલ X ના ઉપયોગ દ્વારા તેમણે આચાર સંહિતાનું ઉલ્લંઘન કર્યું છે. ભાજપે ચૂંટણી પંચને સોશિયલ મીડિયા કંપની પાસે રાહુલ ગાંધીના એકાઉન્ટને તાત્કાલિક સસ્પેન્ડ કરવા અને વાંધાજનક કન્ટેન્ટને તાત્કાલિક દૂર કરવા માટેની અપીલ કરી છે.

પત્રમાં ચૂંટણી પંચને રાહુલ ગાંધી વિરુદ્ધ ફોજદારી ફરિયાદ દાખલ કરવા અને આ સંબંધમાં રાજસ્થાનના મુખ્ય ચૂંટણી અધિકારીને સૂચના આપવા માટે પણ અપીલ કરી છે.

ભાજપે તેની ફરિયાદમાં રાહુલ ગાંધીના ટ્વીટનો સ્ક્રીનશોટ પણ શેર કર્યો હતો. રાહુલ ગાંધીએ સવારે 8.40 વાગ્યે આ ટ્વીટ કર્યું હતું. આ ટ્વીટમાં તેમણે રાજસ્થાનમાં કોંગ્રેસની ચૂંટણી ગેરંટી વિશે જણાવ્યું હતું. ભાજપનો આરોપ છે કે, આચારસંહિતા હેઠળ મતદાનના 48 કલાક પહેલા સાયલન્સ ઝોનની મર્યાદા શરૂ થઈ જાય છે અને કોઈ આ રીતે પ્રચાર કરી શકે નહીં.