હવે પાકની જાસૂસી સંસ્થા શું મલીન આયોજન કરી રહી છે ? તપાસમાં શું થયો ધડાકો ? વાંચો

પહેલગામ હુમલા બાદ ગુપ્તચર એજન્સીઓ સક્રિય છે અને તપાસમાં જોડાઈ છે ત્યારે ગુપ્તચર એજન્સીઓ પાસેથી મળેલી માહિતી અનુસાર, આતંકવાદી સંગઠનો આગામી દિવસોમાં સુરક્ષા દળો અને બિન-સ્થાનિક નાગરિકોને નિશાન બનાવીને હુમલાઓનું આયોજન કરી રહ્યા છે. કાશ્મીરી પંડિતોને ટાર્ગેટ કરવાનો પણ પ્લાન છે .

આ આતંકવાદી સંગઠનો ઉત્તર, મધ્ય અને દક્ષિણ કાશ્મીરમાં સક્રિય છે. ખીણમાં મોટી સંખ્યામાં રેલ્વે કર્મચારીઓ સ્થાનિક નથી, તેથી રેલ્વે કર્મચારીઓને નિશાન બનાવવામાં આવે તેવી શક્યતા નકારી શકાય નહીં. રેલ્વે સુરક્ષા કર્મચારીઓ ઘણીવાર તેમના નિયુક્ત કેમ્પ/બેરેકમાંથી સ્થાનિક વિસ્તારો અને બજારોમાં જતા રહે છે, જે તેમની સુરક્ષાને જોખમમાં મૂકી શકે છે. એટલા માટે કર્મચારીઓની સુરક્ષાને લઈને મોટા પગલાં લેવામાં આવી રહ્યા છે.
અગાઉ, પહેલગામ હુમલાની તપાસ દરમિયાન, રાષ્ટ્રીય તપાસ એજન્સીએ પણ આઈએસઆઈના કપટી કાવતરાનો પર્દાફાશ કર્યો હતો. એનઆઈએ સૂત્રોના જણાવ્યા અનુસાર, પહલગામ હુમલાની તપાસમાં પહાડી વિસ્તારોમાં રહેતા ગુર્જર બકરવાલ સમુદાયના લોકોની પણ પૂછપરછ કરવામાં આવશે, જેમાંથી ઘણા લોકો ગુપ્તચર એજન્સી પાકિસ્તાન આઈએસઆઈના ઓવર ગ્રાઉન્ડ વર્કર્સ હોવાની શંકા છે.

હુમલાનો મુખ્ય આતંકી પાક ફોર્સનો કમાન્ડો હતો

જમ્મુ અને કાશ્મીરના પહેલગામમાં થયેલા ભયાનક આતંકવાદી હુમલાની તપાસમાં એક ચોંકાવનારો ખુલાસો થયો છે. સુરક્ષા એજન્સીઓએ પુષ્ટિ આપી છે કે આ હુમલા પાછળનો માસ્ટરમાઇન્ડ હાશિમ મુસા નામનો પાકિસ્તાની આતંકવાદી છે. જે અગાઉ પાકિસ્તાન આર્મીના સ્પેશિયલ ફોર્સ ‘સ્પેશિયલ સર્વિસ ગ્રુપ’નો પેરા કમાન્ડો હતો.
હાશિમ મુસા હવે લશ્કર-એ-તૈયબા માટે કામ કરી રહ્યો છે. તેને પાકિસ્તાનથી જમ્મુ અને કાશ્મીરમાં બિન-સ્થાનિક લોકો અને સુરક્ષા દળોને નિશાન બનાવવા માટે મોકલવામાં આવ્યો હતો.