માણસે એવું તો શું કર્યું કે અજગર જેવો અજગર મરી ગયો

શિકારી ખુદ શિકાર થઈ ગયો

સાપ અથવા અજગર દંશ મારે તો માણસ મરી જાય પણ ફિલિપાઇન્સ માં એક અનોખી ઘટનામાં અજગર ભરડામાં સપડાયેલા એક માણસે અજગરને એવું બટકું ભર્યું કે અજગરના પ્રાણ છૂટી ગયા અને એ માણસ પોતે સાજો નરવો છે.

ફિલિપાઇન્સનો બોલજુલિયો નામનો ભડવીર બહોલ વિસ્તારમાં મોટરસાયકલ ઉપર જઈ રહ્યો હતો ત્યારે અચાનક ઘાસમાંથી બહાર આવેલા અજગરે તેના હાથ ઉપર દંશ માર્યો હતો. એ શખ્સ બાઈક રોકીને પોતાનો હાથ જોઈ રહ્યો હતો ત્યાં અજગર એ તેના શરીરને ભરડો લઈ લીધો હતો.

અજગર ભરડામાંથી બચવું મુશ્કેલ હોય છે. બોલજુલિયો પણ સમજી ગયો કે હવે મૃત્યુ નિશ્ચિત છે પરંતુ તેણે છેલ્લે સુધી લડાઈ આપવાનું નક્કી કર્યું. મરણીયા બનેલા એ ઈસમે અજગરનું ગળું પકડી અને તેની જાડી ચામડી ચીરી છેક માંસ સુધી બટકું ભર્યું. એ તબક્કે અજગરની પક્કડ ઢીલી થઈ ગઈ. 10 મિનિટ સુધી એ જંગ ચાલ્યો અને તેમાં અજગર માર્યો ગયો. બાદમાં ચાલીને નજીકના ઘર સુધી પહોંચેલા એ શખ્સને હોસ્પિટલમાં દાખલ કરવામાં આવ્યો હતો અને હવે તે સાજો નરવો બહાર પણ આવી ગયો છે. મરી ગયેલા અજગરના માંસને શેકીને બાદમાં ગ્રામજનોએ પાર્ટી કરી હતી.