વડાપ્રધાન મોદીએ મન કી બાતમાં શું કહ્યું ? જુઓ

વડાપ્રધાન મોદીએ રવિવારે 113માં એપિસોડ અંતર્ગત મન કી બાત કરતા દેશને સંબોધન કર્યું હતું. મોદીએ આ કાર્યક્રમ દ્વારા દેશના વિકાસ ગાથા વિશે વાત કરીને કહ્યું કે, 23 ઓગસ્ટે ચંદ્રયાન 3 ની સિદ્ધિને દેશ ક્યારેય ભૂલી શકશે નહીં. એમણે અવકાશ ક્ષેત્રના દિગ્ગજો સાથે વાતચીત કરી હતી. દેશમાં સ્ટાર્ટ અપ નવી દિશા આપી રહ્યા છે તેમ કહીને એમણે યુવકોના ઉત્સાહમાં વધારો કર્યો હતો.

એમણે કહ્યું કે 21મી સદીના ભારતમાં ઘણું બધું સર્જન થઈ રહ્યું છે, જે વિકસિત ભારતનો પાયો મજબૂત કરી રહ્યું છે. ઉદાહરણ તરીકે, આ 23 ઓગસ્ટના રોજ, આપણા બધા દેશવાસીઓએ પ્રથમ રાષ્ટ્રીય અવકાશ દિવસની ઉજવણી કરી, કારણ કે આ દિવસે ચંદ્રયાન 3 એ એક મોટી સિદ્ધિ હાંસલ કરી હતી.

એક ભારત, શ્રેષ્ઠ ભારત 15મી ઓગસ્ટે જોવા મળ્યું
પીએમએ કહ્યું કે, દર વખતની જેમ અમે આ વખતે પણ લોકોને 15 ઓગસ્ટે તિરંગો ફરકાવવાની અપીલ કરી હતી. તેમણે કહ્યું કે, આ અપીલના કારણે કાશ્મીરથી અરુણાચલ સુધી તિરંગા યાત્રા નીકળી અને તેમાં એક ભારત શ્રેષ્ઠ ભારતનું વિઝન જોવા મળ્યું. પીએમે કહ્યું કે, હર ઘર તિરંગા અભિયાનને લોકો તરફથી ખૂબ જ સારો પ્રતિસાદ મળ્યો અને લોકોએ તિરંગા સાથે તેમના ફોટા પણ પોસ્ટ કર્યા.
યુવાનો રાજકારણમાં આવવા તૈયાર છે
મોદીએ કહ્યું કે, આ વર્ષે મેં લાલ કિલ્લા પરથી રાજકીય પૃષ્ઠભૂમિ વગરના એક લાખ યુવાનોને રાજકીય વ્યવસ્થા સાથે જોડવાનો કોલ આપ્યો છે. મને આની જબરદસ્ત પ્રતિક્રિયા મળી છે. આ દર્શાવે છે કે આપણા યુવાનો કેટલી મોટી સંખ્યામાં રાજકારણમાં આવવા તૈયાર છે. તેઓ માત્ર યોગ્ય તક અને યોગ્ય માર્ગદર્શનની શોધમાં છે. પરિવારવાદની રાજનીતિ નવી પ્રતિભાનું દમન કરે છે.
હું આશા રાખું છું કે હવે પ્રયાસોથી એવા યુવાનો જેમની પાસે કોઈ રાજકીય પૃષ્ઠભૂમિ નથી તેઓ પણ રાજકારણમાં આવશે. આઝાદી સમયે પણ ઘણા લોકો રાજકીય પૃષ્ઠભૂમિ વગર રાજકારણમાં આવ્યા હતા. હું મારા યુવા મિત્રોને રાજકારણમાં આવવા કહીશ. તેનાથી દેશ બદલાશે અને મજબૂત થશે.