ભાજપે 10 મી યાદીમાં શું કર્યું ? જુઓ
ભાજપે લોકસભા ચૂંટણી માટે ઉમેદવારોની 10મી યાદી બુધવારે જાહેર કરી હતી. તેમાં 9 ઉમેદવારોના નામ સામેલ છે. રસપ્રદ વાત એ છે કે ભાજપે બંગાળની આસનસોલ બેઠક પર નવો ઉમેદવાર ઉતાર્યો છે. પહેલા આ બેઠક પરથી ભોજપુરી ફિલ્મ સુપરસ્ટાર પવન સિંહને ટિકિટ આપવામાં આવી હતી પણ તેણે ચૂંટણી લડવાનો ઈનકાર કરી દીધો હતો. હવે તેમની જગ્યાએ એસ.એસ.અહલુવાલિયાને ટિકિટ અપાઈ છે. આ ઉપરાંત ચંડીગઢથી કિરણ ખૈર અને પ્રયાગરાજથી રીટા બહુગુણા જોશીની ટિકિટ કપાઈ છે. આ બેઠકો ઉપર ભાજપે નવા ઉમેદવારો ઉતાર્યા છે.
ભાજપે લોકસભા ચૂંટણી માટે આ 10મી યાદી જાહેર કરી હતી. આ યાદીમાં નવ ઉમેદવારોના નામ છે. જેમાં ઉત્તર પ્રદેશની સાત બેઠકો અને પશ્ચિમ બંગાળની આસનસોલ અને ચંદીગઢ બેઠકોનો સમાવેશ થાય છે. ભાજપે ચંદીગઢથી વર્તમાન સાંસદ કિરણ ખૈરનું પત્તું કાપી નાખ્યું છે. સંજય ટંડનને ઉમેદવાર બનાવવામાં આવ્યા છે. સંજય ટંડન ચંદીગઢના ભૂતપૂર્વ પ્રદેશ પ્રમુખ રહી ચૂક્યા છે અને હાલમાં હિમાચલ પ્રદેશના સહ-પ્રભારી પણ છે.
આ સિવાય આસનસોલથી શત્રુઘ્ન સિંહા સામે એસએસ અહલુવાલિયાને મેદાનમાં ઉતારવામાં આવ્યા છે. યુપીની બલિયા સીટ પરથી પૂર્વ વડાપ્રધાન ચંદ્રશેખરના પુત્ર નીરજ શેખરને ટિકિટ આપી છે.આ સિવાય પારસનાથ રાયને યુપીના ગાઝીપુરથી મુખ્તાર અંસારીના ભાઈ અને સપાના ઉમેદવાર અફઝલ અન્સારી સામે મેદાનમાં ઉતારવામાં આવ્યા છે.
જ્યારે યુપીની ફુલપુર બેઠક પરથી પ્રવીણ પટેલ અને અલ્હાબાદ બેઠક પરથી વર્તમાન સાંસદ રીટા બહુગુણા જોશીની ટિકિટ રદ કરીને નીરજ ત્રિપાઠીને આપવામાં આવી છે.
