આતંકી હુમલાનો સંયમિત જવાબ આપવા યુએસની ભારતને અપીલ
યુએસ ઉપરાષ્ટ્રપતિ જેડી વેન્સે પહલગામ હુમલાના જવાબમાં ભારતે વ્યાપક પ્રાદેશિક સંઘર્ષનું જોખમ ટાળવું જોઈએ તેવો મત વ્યક્ત કરી પાકિસ્તાન ભારત સાથે મળીને આ હુમલો કરનાર આતંકવાદીઓને શોધી કાઢવામાં સહકાર આપશે તેવી આશા વ્યક્ત કરી હતી.
વેન્સે ફોક્સ ન્યૂઝના ‘સ્પેશિયલ રિપોર્ટ વિથ બ્રેટ બેયર’ શોમાં વેન્સે કહ્યું ,”અમારી આશા છે કે ભારત આ આતંકવાદી હુમલાનો જવાબ એવી રીતે આપશે કે જેથી વ્યાપક પ્રાદેશિક સંઘર્ષ ન થાય.”
તેમણે ઉમેર્યું, “અને અમે એવી આશા રાખીએ છીએ કે પાકિસ્તાન આ હુમલા માટેની તેની જવાબદારીના પ્રમાણમાં ભારતને સહકાર આપે અને ખાતરી કરે કે તેમના વિસ્તારમાં ક્યારેય કામ કરતા આતંકવાદીઓને શોધીને તેમની સાથે નિપટવામાં આવે.”
પહલગામ હુમલા બાદ ભારત અને પાકિસ્તાન વચ્ચે વધતા તણાવ વચ્ચે ઉપરાષ્ટ્રપતિની આ ટિપ્પણી મહત્વની માનવામાં આવે છે. ઉલ્લેખનીય છે કે તેઓ સહપરિવાર ભારતમાં હતા ત્યારે જ આ હુમલો થયો હતો અને તેમણે પીડિતો અને તેમના પરિવાર પ્રત્યે સંવેદના વ્યક્ત કરી હતી.
બીજી તરફ આતંકવાદ સામેની કોઈપણ લડાઈમાં ટ્રમ્પ અને અમેરિકા ભારત સાથે જ હોવાનું વ્હાઇટ હાઉસના પ્રવક્તાએ વધુ એક વખત જણાવ્યું હતું. જો કે પહેલગામ હુમલામાં પાકિસ્તાનની ભૂમિકા અંગે અમેરિકાએ કોઇપણ અભિપ્રાય આપવાનું ટાળ્યું છે.
