IPLના ‘ડબલ હેડર’માં આજે `એલ ક્લાસીકો’ મુંબઈ-ચેન્નાઈ વચ્ચે મુકાબલો : ધોની-રોહિત સહિતના ખેલાડીઓ એક્શનમાં
- બપોરે ૩:૩૦ વાગ્યે હૈદરાબાદ-રાજસ્થાન પોતાના અભિયાનનો કરશે પ્રારંભ
- ધોની, રોહિત, હાર્દિક ઉપરાંત યશસ્વી, હેડ, ક્લાસેન, અભિષેક, હેટમાયર સહિતના ખેલાડીઓ એક્શનમાં
ઈન્ડિયન પ્રિમીયર લીગ (આઈપીએલ)ની તો દર્શકો રાહ જોઈને બેઠા જ હોય છે સાથે સાથે આ ટૂર્નામેન્ટમાં જેને `એલ ક્લાસીકો’નું બિરુદ આપવામાં આવ્યું છે તે પાંચ-પાંચ વખતની ચેમ્પિયન મુંબઈ-ચેન્નાઈ વચ્ચે ટક્કર થાય તેની પણ આતૂરતા એટલી જ રહેતી હોય છે. આઈપીએલ-૧૮ શરૂ થયાના બીજા જ દિવસે આ બન્ને બળુકી ટીમ આજે ટકરાશે. વળી, આજે રવિવાર હોવાથી ક્રિકેટરસિકો આ મેચને મન ભરીને માણશે. આ મેચ સાંજે ૭:૩૦ વાગ્યાથી શરૂ થશે. તેના પહેલાં બપોરે ૩:૩૦ વાગ્યાથી સનરાઈઝર્સ હૈદરાબાદ અને રાજસ્થાન રોયલ્સ પણ ટૂર્નામેન્ટમાં પોતાના અભિયાનનો પ્રારંભ કરશે.
બપોરે ૩:૩૦ વાગ્યે હૈદરાબાદ-રાજસ્થાન પોતાના અભિયાનનો કરશે પ્રારંભ
`ડબલ હેડર’માં આજે પહેલી મેચ હૈદરાબાદ-રાજસ્થાન વચ્ચે રમાશે. હૈદરાબાદની વાત કરવામાં આવે તો તેમાં ટે્રવિસ હેડ, હેનરિક ક્લાસેન, પેટ કમિન્સ જેવા વિદેશી ખેલાડી છે તો અભિષેક શર્મા, નીતિશકુમાર રેડ્ડી સહિતના ભારતીય બેટરો છે. આ ઉપરાંત ઈશાન કિશન અને મોહમ્મદ શમી પણ આવી ગયા હોવાથી ટીમ વધુ મજબૂત જણાઈ રહી છે. સામે રાજસ્થાન રોયલ્સમાં સંજુ સેમસન, યશસ્વી જયસ્વાલ, શિમરોન હેટમાયર, વાનિંદુ હસારંગા, જોફ્રા આર્ચર, મહિશ તીક્ષ્ણા, રિયાન પરાગ, ધ્રુવ જુરેલ સહિતના ખેલાડી હોય બન્ને ટીમ વચ્ચે મુકાબલો કાંટે કી ટક્કર સમાન બની રહેશે. આ મેચ હૈદરાબાદના રાજીવ ગાંધી સ્ટેડિયમ પર રમાશે.
જ્યારે સાંજે ૭:૩૦ વાગ્યાથી મુંબઈ ઈન્ડિયન્સ-ચેન્નાઈ સુપરકિંગ્સ વચ્ચે જંગ જામશે. બન્ને ટીમના અનેક ખેલાડીઓ જેમાં રોહિત શર્મા, તીલક વર્મા, હાર્દિક પંડ્યા, રવિન્દ્ર જાડેજા, રચિન રવિન્દ્ર, મીચેલ સેન્ટનર, ટે્રન્ટ બોલ્ટ, સેમ કરેન સહિતના અત્યારે ફુલ ફોર્મમાં રમી રહ્યા હોય ક્રિકેટરસિકોને એક મજબૂત મુકાબલો જોવા મળી શકે છે. આ ઉપરાંત ધોની પણ આ મેચનું અલગ જ આકર્ષણ રહેશે. આ મેચ ચેન્નાઈના એમ.એ.ચિદમ્બરમ સ્ટેડિયમ પર રમાશે જ્યાં સ્પીનરોની જ બોલબાલા રહેતી હોય છે.
