અહી તૈયાર થાય છે ઉતર કોરિયાના પરમાણુ બોમ્બ : પ્રતિબંધિત પરમાણુ કેન્દ્રની પ્રથમ તસવીર આવી સામે

ઉત્તર કોરિયા પરમાણુ બોમ્બ તૈયાર કરી રહ્યું છે. હાલમાં જ પ્રતિબંધિત ન્યુક્લિયર સેન્ટરની કેટલીક તસવીરો સામે આવી છે. આ કેન્દ્ર એક યુરેનિયમ સંવર્ધન સ્થળ છે, જ્યાં મોટી સંખ્યામાં સેન્ટ્રીફ્યુજ સ્થાપિત કરવામાં આવ્યા છે. સેન્ટ્રીફ્યુજ એક ખાસ મશીન છે, જે પરમાણુ બોમ્બ બનાવવા માટે જરૂરી સામગ્રી તૈયાર કરે છે. તાજેતરમાં જ ઉત્તર કોરિયાના નેતા કિમ જોંગ ઉને આ કેન્દ્રની મુલાકાત લીધી હતી. આ સિવાય જાપાનના સમુદ્રમાં 600 mm મલ્ટીપલ લોન્ચ રોકેટ સિસ્ટમનું પણ સફળ પરીક્ષણ કરવામાં આવ્યું છે.

કિમ જોંગ ઉને પોતાના વૈજ્ઞાનિકોને કહ્યું છે કે પરમાણુ હથિયારોનો ભંડાર વધારવો, આથી પરમાણુ સામગ્રીના ઉત્પાદનની માત્રામાં વધારો કરો, આ ઉપરાંત તેમણે ન્યુક્લિયર વેપન ઈન્સ્ટિટ્યૂટની પણ મુલાકાત લીધી હતી. જ્યાં તેણે હથિયાર-ગ્રેડ પરમાણુ સામગ્રી બનાવવાનું કહ્યું છે. આ પહેલીવાર છે જ્યારે ઉત્તર કોરિયાના ન્યુક્લિયર પ્રોગ્રામની તસવીર સામે આવી છે.

કિમ જોંગ ઉન જ્યાં ફરે છે જ્યાં સંયુક્ત રાષ્ટ્રની સુરક્ષા પરિષદ દ્વારા પ્રતિબંધ મૂકવામાં આવ્યો છે. જે તસવીરો સામે આવી છે તેમાં સ્પષ્ટપણે જોઈ શકાય છે કે કિમ જોંગ સેન્ટ્રીફ્યુજની વચ્ચે ફરતા હોય છે. આ એ જ મશીનો છે જે યુરેનિયમને પરમાણુ બોમ્બ માટે યોગ્ય બનાવે છે. કિમ જોંગ ઉન ક્યારે ગયા તે જાહેર કરવામાં આવ્યું નથી. ઉપરાંત, આ સાઇટ દેશના કયા ભાગમાં છે તે પણ જાહેર કરવામાં આવ્યું નથી.

અમેરિકા સાથે યુદ્ધની તૈયારી…

કિમ જોંગ ઉને સેન્ટ્રીફ્યુજ સાઇટના કર્મચારીઓ અને વૈજ્ઞાનિકોને શક્ય તેટલા વ્યૂહાત્મક પરમાણુ હથિયારો બનાવવા કહ્યું છે. તેણે એમ પણ કહ્યું કે તે અમેરિકા અને તેના સહયોગી દેશો સાથે યુદ્ધ કરી શકે છે. તો આવી સ્થિતિમાં તે જરૂરી બની શકે છે. જેથી ઉત્તર કોરિયાને સુરક્ષિત કરી શકાય. જો જરૂરી હોય તો, અમે પહેલા હુમલો કરી શકીએ છીએ. કિમ જોંગ ઉને કહ્યું કે આપણા દેશને અમેરિકા અને તેના મિત્ર દેશો તરફથી પરમાણુ હુમલાનો ખતરો છે. અમેરિકા અને તેનું સમર્થન કરનારાઓએ રેડ લાઇન પાર કરી છે.

ઉત્તર કોરિયા પાસે ઘણી સંવર્ધન સાઇટ્સ હોવાનું માનવામાં આવે છે. સેટેલાઇટ ઇમેજ દ્વારા પણ આવા સેન્ટરો સામે આવ્યા છે. આ પૈકીનું મુખ્ય યોંગબ્યોન ન્યુક્લિયર સાયન્ટિફિક રિસર્ચ સેન્ટર છે. તેનો પોતાનો યુરેનિયમ સંવર્ધન પ્લાન્ટ છે. તેના વિસ્તરણની તૈયારીઓ પણ ચાલી રહી છે.

ઉત્તર કોરિયા પાસે કેટલા પરમાણુ શસ્ત્રો છે ?

ઉત્તર કોરિયા પાસે લગભગ 50 પરમાણુ હથિયારો છે. પરંતુ તેની પાસે એટલી બધી પરમાણુ સામગ્રી છે કે તે તેમાંથી 70 થી 90 વધુ પરમાણુ શસ્ત્રો બનાવી શકે છે. તે તેનો ઉપયોગ તેની ઇન્ટરકોન્ટિનેન્ટલ બેલિસ્ટિક મિસાઇલોમાં કરી શકે છે. આ મિસાઈલો અમેરિકા સુધી પહોંચવામાં સક્ષમ છે. આ સિવાય ઉત્તર કોરિયા સબમરીનથી લોંચ કરવામાં આવેલી મિસાઈલ પર પણ કામ કરી રહ્યું છે. તેથી ત્યાંથી પણ ખતરો છે.

કિમે 600 એમએમના અનેક રોકેટ છોડ્યા હતા

કિમ જોંગ ઉને ગુરુવારે જાપાનના દરિયાકાંઠે 600 mm મલ્ટીપલ લોન્ચ રોકેટ સિસ્ટમનું સફળતાપૂર્વક પરીક્ષણ કર્યું હતું. ઉત્તર કોરિયાની સરકારી સમાચાર એજન્સી KCNA દ્વારા આ માહિતી આપવામાં આવી છે. આ રોકેટના પરીક્ષણ દરમિયાન કિમ જોંગ ઉન પોતે ત્યાં હાજર હતા. રોકેટોએ તેમના લક્ષ્યોને સફળતાપૂર્વક ફટકાર્યા. આ લક્ષ્યો જાપાનના સમુદ્રમાં નિર્ધારિત કરવામાં આવ્યા હતા.