આ સર્વોચ્ચ અદાલત છે, આઝાદ મેદાન નથી કે ગમે તેમ ભાષણ કરો
અદાલતે એડવોકેટને આકરા શબ્દોમાં તતડાવ્યા
વરિષ્ઠ વકીલોની નિયુક્તિમાં ન્યાયાધીશોના સંતાનોને અગ્રીમ પસંદગી અપાતી હોવાના આક્ષેપ સાથે થયેલી એક અરજીની સુનાવણી દરમિયાન સર્વોચ્ચ અદાલતે એ અરજી કરનાર વકીલની આકરા શબ્દોમાં ઝાટકણી કાઢી હતી.
એડવોકેટ મેથ્યુઝસ જે. નેદુમપરાએ કરેલી અરજીની સુનાવણી દરમિયાન ન્યાયાધીશો સામે કરવામાં આવેલા
આરોપો અવ્યવસ્થિત અને પાયાવિહોણા હોવાનું સર્વોચ્ચ અદાલતે જણાવ્યું હતું. જસ્ટિસ બી.આર ગવાય અને જસ્ટિસ કેવી વિશ્વનાથનની ખંડપીઠે કહ્યું કે વર્તમાનમાં ફરજ બજાવતા તે નિવૃત્ત થયેલા ન્યાયાધીશોના સંતાનો 40 વર્ષની વય વટાવી ગયા હોય તે માનવું મુશ્કેલ છે.
તેમણે એડવોકેટને સવાલ કર્યો હતો કે,” જેમના સંતાનોની વરિષ્ઠ વકીલ તરીકે નિયુક્તિ કરવામાં આવી છે તેવા કેટલા જજ ના નામ તમે આપી શકો છો?”
સુનાવણી દરમિયાન વકીલ મેથ્યુઝે ન્યાયાધીશોથી વકીલો ભય અનુભવતા હોવાની દલીલ કરે ત્યારે જસ્ટિસ બી.આર. ગવઈએ આકરા શબ્દોમાં કહ્યું કે આ અદાલત છે, બોટ ક્લબ કે મુંબઈનું આઝાદ મેદાન નથી કે જ્યાં તમે ભાષણો કરી શકો. તેમણે એડવોકેટને ‘ગેલેરી ‘ માટે દલીલો કરવાને બદલે કાયદાકીય દલીલ કરવાની સૂચના આપી હતી. અદાલતે કહ્યું કે ન્યાયિક સંસ્થા વિરુદ્ધ વિવિધ બેફામ અને પાયાવિહોણા આક્ષેપો સ્વીકારી શકાય નહીં. તેમણે એડવોકેટને અરજીમાં સુધારો કરવાની મંજૂરી આપી હતી અને જો તેમ ન કરવામાં આવે તો કડક પગલાં લેવાની ચીમકી ઉતારી હતી.
