1લી ઓક્ટોબરથી આ 10 મોટા ફેરફાર થશે : દરેકના ખિસ્સાને કરશે અસર

ગેસ સિલિન્ડર, આધાર કાર્ડ, રેલવે અને નાની બચત યોજનાઓ સહિત અનેક બાબતોના નિયમોમાં થશે ફેરફાર

મંગળવારથી ઓક્ટોબર મહિનો શરુ થઇ રહ્યો છે અને આર્થિક ક્ષેત્રે કેટલાક એવા ફેરફાર આવી રહ્યા છે જે સામાન્ય લોકોના ખિસ્સાને અસર પહોંચાડી શકે છે. પહેલી ઓક્ટોબરથી ગેસ સિલિન્ડર અને આધાર કાર્ડથી લઈને નાની બચત યોજના સુધીના ઘણા નિયમો બદલાવા જઈ રહ્યા છે.

ગેસ સિલિન્ડરના દરો
એલપીજી સિલિન્ડરની કિંમત દર મહિનાની પહેલી તારીખે બદલાય છે. ઓઈલ માર્કેટિંગ કંપનીઓ આ વખતે પણ 1 ઓક્ટોબરથી નવા દર લાગુ કરશે. આશા છે કે તહેવારોની સિઝનમાં સસ્તા ગેસ સિલિન્ડરની ભેટ આપવામાં આવી શકે છે.

આધાર કાર્ડ
હવે 1 ઓક્ટોબરથી પાન કાર્ડ અથવા ઈન્કમ ટેક્સ રિટર્નફાઈલ કરવા માટે આધાર એનરોલમેન્ટ આઈડીનો ઉપયોગ કરી શકશો નહીં. આવકવેરા કાયદાની કલમ 139AA હેઠળ, પાન કાર્ડ અથવા ઇન્કમટેક્સ રીટર્ન માટે આધાર નંબર આપવો જરૂરી રહેશે.

રેલ્વેનું વિશેષ ટિકિટ ચેકિંગ અભિયાન
રેલવે 1 ઓક્ટોબરથી ટિકિટ વિના મુસાફરી કરનારાઓ સામે વિશેષ ટિકિટ ચેકિંગ અભિયાન શરૂ કરવા જઈ રહ્યું છે. તહેવારોની સિઝનમાં મુસાફરોની સંખ્યામાં વધારો થવાને કારણે આવું કરવામાં આવી રહ્યું છે.

પોસ્ટ ઓફિસ એકાઉન્ટ પર વ્યાજ દર
પોસ્ટ ઓફિસ ખાતા પરના વ્યાજ દરોમાં પણ ફેરફાર થવા જઈ રહ્યો છે. નેશનલ સ્મોલ સેવિંગ્સ સ્કીમ એકાઉન્ટ્સ પર વ્યાજ દરોમાં ફેરફાર ગરીબ અને માધ્યમ વર્ગની વ્યાજની આવકને અસર કરી શકે છે.

સીએનજી અને પીએનજીના દરમાં ફેરફાર થશે
દર મહિનાની પહેલી તારીખે, ઓઇલ માર્કેટિંગ કંપનીઓ એટીએફ, સીએનજી અને પીએનજીના દરોમાં ફેરફાર કરે છે. સપ્ટેમ્બરમાં એટીએફના ભાવમાં ઘટાડો કરવામાં આવ્યો હતો.

બોનસ શેરનો T+2 નિયમ
સેબીએ બોનસ શેરના ટ્રેડને સરળ બનાવવા માટે એક નવું માળખું તૈયાર કર્યું છે. 1 ઓક્ટોબરથી બોનસ શેરનું ટ્રેડિંગ T+2 સિસ્ટમમાં થશે. આના કારણે રેકોર્ડ ડેટ અને ટ્રેડિંગ વચ્ચેનો સમય ઘટી જશે. શેરધારકોને આનો ફાયદો થશે.

નાની બચત યોજનાઓના નિયમો બદલાયા
નાણા મંત્રાલયે નેશનલ સ્મોલ સેવિંગ્સ સ્કીમ હેઠળ ખોટી રીતે ખોલેલા ખાતાઓ અંગે માર્ગદર્શિકા જારી કરી છે. હવે પી.પી.એફ.અને સુકન્યા સમૃદ્ધિ જેવા ખાતાઓને નાણા મંત્રાલય દ્વારા નિયમિત કરવામાં આવશે. જેના કારણે તમારે ભવિષ્યમાં મુશ્કેલીનો સામનો કરવો નહીં પડે.

સિક્યોરિટી ટ્રાન્ઝેક્શન ટેક્સમાં વધારો
ફ્યુચર્સ એન્ડ ઓપ્શન્સ ટ્રેડિંગ પર સિક્યોરિટી ટ્રાન્ઝેક્શન ટેક્સમાં પણ ફેરફાર થવા જઈ રહ્યો છે. 1 ઓક્ટોબરથી, ઓપ્શનના વેચાણ પર STT વધીને 0.1% થશે, જે પહેલા 0.0625% હતો. આના કારણે ટ્રેડર્શને ઓપ્શન ખરીદ-વેચાણના વિકલ્પોમાં થોડો વધારાનો ખર્ચ ઉઠાવવો પડશે. તેનાથી ડેરિવેટિવ્ઝ માર્કેટ પર અસર થશે.

વિવાદ સે વિશ્વાસ યોજના શરૂ કરવામાં આવશે
CBDT એ જાહેરાત કરી છે કે ‘વિવાદ સે વિશ્વાસ સ્કીમ 2024’ 1 ઓક્ટોબરથી લાગુ કરવામાં આવશે. તેની મદદથી આવકવેરાને લગતા વિવાદોનો ઉકેલ આવશે. કોર્ટ અને ટ્રિબ્યુનલ સમક્ષ પડતર કેસોનો નિકાલ કરવામાં આવશે.

HDFC ક્રેડિટ કાર્ડ લોયલ્ટી પ્રોગ્રામમાં ફેરફાર
મંગળવારથી HDFC બેંકના ક્રેડિટ કાર્ડના લોયલ્ટી પ્રોગ્રામમાં ફેરફાર થવા જઈ રહ્યો છે. નવા નિયમ મુજબ,એચ.ડી.એફ.સી. બેંકે SmartBuy પ્લેટફોર્મ પર એપલ ઉત્પાદનો માટે રિવાર્ડ પોઈન્ટના રિડેમ્પશનને કેલેન્ડર ક્વાર્ટર દીઠ એક પ્રોડક્ટ સુધી મર્યાદિત કરી દીધા છે.