વિશ્વના સૌથી ઊંચા બ્રીજ ઉપરથી સૌપ્રથમ ટ્રાયલ ટ્રેન દોડી

રેલવે મંત્રી અશ્વિની વૈષ્ણવે કરી જાહેરાત : ૧૪ હજાર કરોડના ખર્ચે તૈયાર થયો ચિનાબ નદી ઉપર એફિલ ટાવરથી પણ ઉંચો બ્રીજ

જમ્મુ અને કાશ્મીરમાં ચીનાબ નદી પર વિશ્વનો સૌથી ઉંચો રેલ્વે બ્રિજ-ચેનાબ રેલ્વે બ્રિજ પૂર્ણ થઈ ગયો છે. ટૂંક સમયમાં જ આ સિંગલ રૂટ પર ટ્રેન સેવા શરૂ કરવામાં આવશે. ઉત્તર રેલ્વેએ કહ્યું હતું કે ભારતીય રેલવેએ જમ્મુ-કાશ્મીરની ચિનાબ નદી પર બનેલા વિશ્વના સૌથી ઊંચા રેલ પુલ સહિત સંગલદાનથી રિયાસી સુધીની પ્રથમ ટ્રાયલ ટ્રેનનું સંચાલન કર્યું હતું

રિયાસીના ડેપ્યુટી કમિશનર વિશેષ મહાજને જણાવ્યું હતું કે, ચિનાબ બ્રિજ લેટેસ્ટ ટેક્નોલોજીનું અનોખું ઉદાહરણ છે. રિયાસીમાં રહેતા દરેક રહેવાસી તે દિવસની રાહ જોઈ રહ્યા છે જ્યારે રેલ્વે બ્રિજથી રામબન જિલ્લાના સંગલદાન અને રિયાસી વચ્ચે ટ્રેનોની અવરજવર શરૂ થશે. ચેનાબ બ્રિજ એ આધુનિક વિશ્વનું એન્જિનિયરિંગ અજાયબી છે. જે દિવસે ટ્રેન આ ચિનાબ બ્રિજને પાર કરીને પ્રથમ વખત રિયાસી પહોંચશે, તે દિવસ જિલ્લામાં રહેતા દરેક રહેવાસી માટે એક મહાન પરિવર્તનનો દિવસ હશે. આ અમારા માટે ગર્વની ક્ષણ હશે, કારણ કે અમારા એન્જિનિયરોએ એક અજાયબી સર્જી છે. આ દુનિયાની આઠમી અજાયબી છે. આ પુલ અદ્ભુત છે. તેમણે વધુમાં કહ્યું હતું કે ટ્રેન સેવા શરૂ કરવાની ચોક્કસ તારીખ આપી શકાય તેમ નથી, પરંતુ મને આશા છે કે તે દિવસ જલ્દી આવશે.

જમ્મુ અને કાશ્મીરમાં ચિનાબ નદી પર 359 મીટર (લગભગ 109 ફૂટ) ની ઊંચાઈએ બનેલો ચિનાબ રેલ બ્રિજ એફિલ ટાવર કરતા લગભગ 35 મીટર ઊંચો છે. આ પુલ અદભૂત સ્ટીલ કમાન ડિઝાઇન ધરાવે છે, જેની કુલ લંબાઈ 1,315 મીટર (4,314 ફૂટ) છે. આ કમાનની લંબાઈ 467 મીટર (1,532 ફૂટ) છે. આ સિંગલ-ટ્રેક રેલ્વે લાઇન છે, જે કાશ્મીર ખીણને બાકીના ભારતીય રેલ્વે નેટવર્ક સાથે જોડે છે.

હાલમાં, કન્યાકુમારીથી કટરા સુધીની રેલ્વે લાઇન પર ટ્રેનો ચાલે છે, જ્યારે કાશ્મીર ખીણમાં બારામુલાથી સાંગલદાન સુધી સેવાઓ ચાલે છે. ચેનાબ રેલ્વે બ્રિજ કાર્યાન્વિત થયા બાદ રામબનથી રિયાસી સુધી ટ્રેન સેવા ચાલશે. ભારતીય રેલ્વેએ આ પુલ પર તેની સફળ ટ્રાયલ શરૂ કરી દીધી છે.