દિલ્હી વિધાનસભાની ચૂંટણી માટે આપે ૧૧ની પ્રથમ યાદી જાહેર કરી

ત્રણ ધારાસભ્યોની ટિકિટ કપાઈ : કોંગ્રેસ-ભાજપમાંથી આવેલાને ઉમેદવાર બનાવાયા

દિલ્હી વિધાનસભા ચૂંટણી માટે આમ આદમી પાર્ટીએ ઉમેદવારોની પ્રથમ યાદી જાહેર કરી છે. પક્ષે પ્રથમ યાદીમાં 11 ઉમેદવારોના નામ જાહેર કર્યા છે. જેમાંથી 6 ઉમેદવારો ભાજપ-કોંગ્રેસમાંથી પક્ષ પલટો કરીને આવેલા છે. ભાજપમાંથી ધારાસભ્ય રહી ચૂકેલા બે નેતાઓને આપ દ્વારા ટિકિટ આપવામાં આવી છે. દિલ્હીમાં મોટાભાગે જાન્યુઆરીમાં ચૂંટણી થવાની છે.

જેમને ટીકીટ આપવામાં આવી છે તેમાં બ્રહ્માસિંહ તંવર-છતરપુર,અનિલ જ્હાં-કિરાડી,દિપક સિંઘલા-વિશ્વાસ નગર,સરિતાસિંહ-રોહતાસ,બીબી ત્યાગી-લક્ષ્મી નગર,રામસિંહ-બદરપુર,ઝુબૈર ચૌધરી-સીલમપુર,વીરસિંહ ઘીંગાણ-સીમાપુરી,ગૌરવ શર્મા-ઘોંડા,મનોજ ત્યાગી-કરાવલ નગર અને
સોમેશ શૌકીન-મટિયાલાનો સમાવેશ થાય છે.

આપ દ્વારા જાહેર કરવામાં આવેલા 11 ઉમેદવારોની પ્રથમ યાદીમાં ત્રણ ધારાસભ્યોની ટિકિટ કપાઈ છે. જેમાં કિરાડીમાંથી ઋતુરાજ જ્હાં, સીલમપુરમાંથી અબ્દુલ રહમાન, અને મટિયાલામાંથી ગુલાબસિંહ છે. પક્ષે આ ત્રણેય નેતાઓને ટિકિટ આપવાના બદલે ભાજપ અને કોંગ્રેસમાંથી આવેલા એવા નેતાઓને ટિકિટ આપવાનું પસંદ કર્યું છે કે, જેઓ 2020માં ચૂંટણી હારી ગયા હતા. 2020માં યોજાયેલી વિધાનસભા ચૂંટણીમાં આપએ કુલ 70માંથી 62 બેઠકો પર જીત હાંસલ કરી હતી.