વિશ્વના સૌથી મોટા ડ્રગ ડોનનો અંત! મેક્સિકોના ખૂંખાર ડ્રગ ડોન અલ મેન્ચોના પતન માટે તેની સ્ત્રી મિત્ર જ નિમિત બની, જાણો સમગ્ર મામલો
મેક્સિકોમાં વર્ષોથી પોલીસ-આર્મી અને ડ્રગ કાર્ટેલ વચ્ચે ચાલતા યુદ્ધમાં ડ્રગ ડોન અલ મેન્ચોના મૃત્યુ સાથે એક મહત્વનો વણાંક આવ્યો છે.રસપ્રદ વાત એ છે કે વર્ષોથીમેક્સિકો અને અમેરિકાના સુરક્ષા દળો અને એજન્સીઓને હાથતાળી આપતા દેશના સૌથી શક્તિશાળી ડ્રગ કાર્ટેલ” જાલિસ્કો ન્યૂ જનરેશન કાર્ટેલ” ના વડા નેમેસિયો ઓસેગેરા સર્વાન્ટેસ ઉર્ફે અલ મેન્ચો સુધી પહોંચવામાં તેની પ્રેમિકા જ નિમિત બની હતી.બીજી તરફ અલ મેન્ચોના મૃત્યુ પછી દેશના 20 કરતાં વધુ જિલ્લાઓમાં રસ્તા પર ઉતરી આવેલા ડ્રગ માફીયાઓ અને મેક્સિકોના આર્મી વચ્ચે બીજા દિવસે પણ જંગ જારી રહ્યો હતો. અત્યાર સુધીમાં તેમાં સુરક્ષા દળના કર્મચારીઓ સહિત કુલ 70 લોકોના મૃત્યુ થયા હોવાના અહેવાલ છે.
મેક્સિકન સેનાએ જાહેર કરેલા વિગતો મુજબ, અમેરિકા અને મેક્સિકો બંને દેશો વર્ષોથી આ ડોનને શોધી રહ્યા હતા. અનેક વખત તે હાથમાંથી સરકી ગયો હતો. પરંતુ આ વખતે ગુપ્તચર વિભાગે સીધી નજર તેના પર નહીં, પણ તેના વ્યક્તિગત જીવન પર રાખી હતી અને તેના નજીકના સાથીઓ સતત રડારમાં હતા.
સેનાના તપાસકર્તાઓએ અલ મેન્ચોની એક નજીકની સ્ત્રી મિત્ર સાથે સંકળાયેલા વિશ્વાસુ સહયોગીને ટ્રેક કર્યો હતો. તે વ્યક્તિ શુક્રવારે એ મહિલાને અલ મેન્ચી જ્યાં છુપાયો હતો તે જાલિસ્કો રાજ્યના ટાપાલ્પા નામના પહાડી વિસ્તાર સુધી લઈ ગયો હતો.અમેરિકન ઇન્ટેલિજન્સ તરફથી મળેલી મહત્વપૂર્ણ વધારાની માહિતી અને એ ચોક્કસ સ્થાનની જાણકારી મળ્યા બાદ મેક્સિકન આર્મી અને તેની વિશેષ ટીમો ત્રાટકવા માટે તૈયાર થઈ ગઈ હતી.એ મહિલા રાત્રિ રોકાણ કરીને ત્યાંથી રવાના થઈ એ સાથે જ આ દિલધડક ઓપરેશન શરૂ થયું હતું.
અલ મેન્ચો જંગલમાં ભાગ્યો પણ અંતે…
રવિવારે વહેલી સવાર પહેલાં મેક્સિકન આર્મી અને નેશનલ ગાર્ડે એ જગ્યાને ઘેરી લઈ છટકવાના તમામ દરવાજા બંધ કરી દીધા હતા. આસપાસના રાજ્યોમાં સ્પેશિયલ ફોર્સ અને છ હેલિકોપ્ટર સ્ટેન્ડબાય રાખવામાં આવ્યા હતા અને એર ફોર્સના વિમાનોએ ઉપરથી રેકી કરી હતી. બીજી તરફ સેનાએ આગળ વધવાનું શરૂ કર્યું તે સાથે જ કાર્ટેલના સશસ્ત્ર માફિયાઓએ જોરદાર ફાયરિંગ શરૂ કર્યું હતું. અલ મેન્ચો બે બોડીગાર્ડ સાથે ભાગવાનો પ્રયાસ કરી જંગલ વિસ્તારમાં છુપાયો હતો પણ ભારે ગોળીબાર પછી સ્પેશિયલ ફોર્સે તેને ઝાડીઓમાં છુપાયેલો શોધી કાઢ્યો. એન્કાઉન્ટરમાં તે અને તેના બે બોડીગાર્ડ ગંભીર રીતે ઘાયલ થયા. તેમને હેલિકોપ્ટર દ્વારા હોસ્પિટલ લઈ જવાતા રસ્તામાં જ મોત નીપજ્યું હતું.
નેશનલ ગાર્ડના 25 જવાનોના મોત: સેનાના હેલિકોપ્ટર ઉપર ગોળીબાર
અલ મેન્ચોના મૃત્યુ બાદ મેક્સિકો માં ભયંકર તોફાનો ફાટી નીકળ્યા છે. અત્યાર સુધીમાં ડ્રગ માફીયાઓ સાથેની અથડામણમાં નેશનલ ગાર્ડના 25 જવાનો મૃત્યુ પામ્યા છે. મૃતકોમાં જેલ અધિકારી, પ્રોસિક્યુટર ઓફિસ કર્મચારી અને એક મહિલા નાગરિકનો સમાવેશ થાય છે. બીજી તરફ સુરક્ષા દળોએ માફિયા કાર્ટેલના 30 કરતાં વધુ સભ્યોને ઢાળી દીધા હતા. સૂત્રોના જણાવ્યા મુજબ મેક્સિકોમાં ગૃહ યુદ્ધ જેવી સ્થિતિ નિર્માણ પામી છે.
ડ્રગ માફીઆઓ અને આર્મી વચ્ચે અનેક નગરોમાં બીજા દિવસે પણ જંગ જારી રહ્યો હતો. સુરક્ષા દળોની કાર્યવાહી દરમિયાન કાર્ટેલ પાસેથી બે રોકેટ લોન્ચર સહિત ભારે શસ્ત્રો મળી આવ્યાં હતા.મિચોઆકાન નામના શહેરમાં થયેલી અથડામણમાં ઓછામાં ઓછા 15 સુરક્ષા કર્મચારીઓ ઘાયલ થયા હોવાના અહેવાલ છે. ડ્રગ માફિયાઓએ સેનાના હેલિકોપ્ટર ઉપર પણ ગોળીબાર કરતા હેલિકોપ્ટરનો ઈમરજન્સી લેન્ડિંગ કરવું પડ્યું હતું.
અલ મેન્ચો લાંબા સમયથી અમેરિકા-મેક્સિકોની મોસ્ટ વોન્ટેડ યાદીમાં હતો અને ફેન્ટાનાઇલ તથા કોકેન તસ્કરીનો વૈશ્વિક નેટવર્ક ચલાવતો હતો. તેની મૃત્યુ સાથે મેક્સિકોમાં એક યુગ સમાપ્ત થયો છે પરંતુ અધિકારીઓએ સ્વીકાર્યું છે કે કાર્ટેલ હજી જીવંત છે અને આગામી દિવસોમાં બદલો લઈ શકે છે.
