જેમ જેમ સ્વતંત્રતા દિવસ નજીક આવી રહ્યો છે તેમ તેમ દેશભરમાં સુરક્ષા વ્યવસ્થા સઘન બનાવવામાં આવી છે. જ્યારે દેશભરમાં સ્વતંત્રતા દિવસની ઉજવણીની તૈયારીઓ જોરશોરથી ચાલી રહી છે. દરમિયાન સૂત્રો પાસેથી સમાચાર આવી રહ્યા છે કે આતંકવાદીઓ દેશમાં આતંક ફેલાવવાની યોજના બનાવી રહ્યા છે.સ્વતંત્રતા દિવસ (15 ઓગસ્ટ) પહેલા દેશમાં કોઈ મોટા હુમલાની શક્યતાને લઈને એલર્ટના કારણે સુરક્ષા વ્યવસ્થા વધુ કડક કરવામાં આવી છે. મળતી માહિતી મુજબ, ગુપ્તચર એજન્સીઓને એલર્ટ મળ્યું છે કે આતંકવાદીઓ 15 ઓગસ્ટ પહેલા દેશમાં મોટો હુમલો કરી શકે છે. સૂત્રોનું માનીએ તો એજન્સીઓને મળેલી માહિતીમાં સામે આવ્યું છે કે આતંકવાદીઓ માનવ બોમ્બના રૂપમાં હુમલો કરી શકે છે. VVIPને નિશાન બનાવી શકાય છે.
જમ્મુ-કાશ્મીરમાં તકેદારી વધારવા સૂચના
જમ્મુ-કાશ્મીરમાં વધુ સાવચેત રહેવાની સલાહ આપવામાં આવી છે. તમને જણાવી દઈએ કે તાજેતરના દિવસોમાં જમ્મુ-કાશ્મીરમાં આતંકવાદી ઘટનાઓમાં વધારો થયો છે. ખાસ કરીને જમ્મુના વિસ્તારોમાં આતંકવાદી ઘટનાઓ વધી છે. હવે ગુપ્તચર એજન્સીઓએ એલર્ટ કર્યું છે કે આ સમયગાળા દરમિયાન આતંકવાદી ઘટનાઓ બની શકે છે. આવી સ્થિતિમાં તકેદારી વધારવા સૂચના આપવામાં આવી છે.
મળતી માહિતી મુજબ, પાકિસ્તાની ગુપ્તચર એજન્સી ISIS, લશ્કર-એ-તૈયબા, TRF અને જૈશ-એ-મોહમ્મદ જેવા આતંકવાદી સંગઠનોને દરેક રીતે મદદ કરી રહી છે અને આ સંગઠનોને હુમલા કરવા માટે ઉશ્કેરે છે. કઠુઆ, ડોડા, ઉધમપુર, પુંછ અને રાજૌરીમાં થયેલા તાજેતરના હુમલાઓને ધ્યાનમાં રાખીને એલર્ટ રહેવાની સલાહ આપવામાં આવી છે. એવા ઈનપુટ મળ્યા છે કે સશસ્ત્ર આતંકવાદીઓ હજુ પણ ભારતમાં હાજર છે અને તેમની યોજના મુજબ વીઆઈપી લોકોને નિશાન બનાવી શકાય છે.
દિલ્હીમાં પણ એલર્ટ
ઈન્ટેલિજન્સ એલર્ટ મુજબ ભીડભાડવાળી જગ્યાઓ અને પ્રતિષ્ઠિત સ્થળોને નિશાન બનાવી શકાય છે. દિલ્હી હંમેશા જૈશ-એ-મોહમ્મદ અને લશ્કર માટે મુખ્ય નિશાના પર રહ્યું છે. એવા સમાચાર છે કે પાકિસ્તાન ડ્રોન દ્વારા પુંછ અને જમ્મુમાં સતત હથિયારો મોકલી રહ્યું છે.
દિલ્હી એરપોર્ટ અને દિલ્હીની સરહદો પર વિશેષ તકેદારી રાખવા માટે કહેવામાં આવ્યું છે. તમને જણાવી દઈએ કે સ્વતંત્રતા દિવસના અવસર પર ઘણા VIP લાંબા સમય સુધી ખુલ્લામાં રહે છે. દિલ્હીમાં સુરક્ષા વ્યવસ્થા પહેલાથી જ એલર્ટ મોડ પર છે.
