- વડાપ્રધાન ગાંધી જયંતી દિને સ્વચ્છતા અભિયાનમાં જોડાયા
વડાપ્રધાન નરેન્દ્ર મોદીએ બુધવારે ગાંધી જયંતિ નિમિત્તે રાજધાની દિલ્હીમાં આયોજિત સ્વચ્છતા અભિયાન કાર્યક્રમમાં ભાગ લીધો હતો અને લોકોને સ્વચ્છ ભારતની ભાવનાને વધુ મજબૂત કરવા આ અભિયાનમાં જોડાવા અપીલ કરી હતી. એમણે આ તકે કહ્યું હતું કે સ્વચ્છ ભારત અભિયાનને 10 વર્ષ પૂરા થયા છે અને હવે તે જન આંદોલન બન્યું છે.
પ્રધાનમંત્રીએ કહ્યું, “હું તમને બધાને વિનંતી કરું છું કે તમે તમારા આસપાસના વિસ્તારમાં સ્વચ્છતા સંબંધિત અભિયાનનો ભાગ બનો. તમારી આ પહેલ ‘સ્વચ્છ ભારત’ની ભાવનાને વધુ મજબૂત કરશે.” વડાપ્રધાને 2014 માં સ્વચ્છ ભારત અભિયાન લોન્ચ કર્યું હતું.
તેમણે સ્વચ્છ ભારત અભિયાનને દેશમાં બહેતર સ્વચ્છતા સુવિધાઓ સુનિશ્ચિત કરવા માટેનો એક મહત્વપૂર્ણ સામૂહિક પ્રયાસ ગણાવ્યો અને તેને સફળ બનાવવામાં યોગદાન આપનારાઓને સલામ કર્યા.
મોદીએ ‘X’ પર એક પોસ્ટમાં કહ્યું, “ગાંધી જયંતિ પર, મારા યુવા મિત્રો સાથે સ્વચ્છતા અભિયાનનો ભાગ બન્યો. હું તમને બધાને વિનંતી કરું છું કે તમે આજે તમારી આસપાસ સ્વચ્છતા સંબંધિત અભિયાનનો ભાગ બનો. તમારી આ પહેલ ‘સ્વચ્છ ભારત’ની ભાવનાને વધુ મજબૂત કરશે.”
તેમણે કહ્યું કે આપણે સ્વચ્છ ભારતના 10 વર્ષ પૂર્ણ કરી રહ્યા છીએ, જે ભારતને સ્વચ્છ બનાવવા અને વધુ સારી સ્વચ્છતા સુવિધાઓ સુનિશ્ચિત કરવાનો એક મહત્વપૂર્ણ સામૂહિક પ્રયાસ છે. તેમણે કહ્યું, “હું એ તમામ લોકોને સલામ કરું છું જેમણે આ ચળવળને સફળ બનાવવા માટે કામ કર્યું છે.”
