સોનિયા, રાહુલ, પ્રિયંકા જનતાનો આભાર માનવા આવતીકાલે રાયબરેલી જશે

2024ની લોકસભા ચૂંટણીમાં કોંગ્રેસે એકવાર સારું પ્રદર્શન કર્યું છે. કોંગ્રેસે આ વખતે 99 બેઠકો જીતી છે. રાહુલ ગાંધી આ વખતે બે બેઠકો પરથી ચૂંટણી લડ્યા હતા. તેણે બંને સીટો પર જીત મેળવી છે.

રાહુલ ગાંધી રાયબરેલી અને વાયનાડથી ચૂંટણી લડ્યા હતા. બંને બેઠકો પર તેમણે 3 લાખથી વધુ મતોથી જીત મેળવી છે. હવે તેઓ 11 જૂને રાયબરેલી જશે અને લોકોનો આભાર માનશે.

મળતી માહિતી મુજબ રાહુલ, પ્રિયંકા અને સોનિયા ગાંધી 11 જૂને રાયબરેલી જશે. આ દરમિયાન તે ત્યાંના લોકોને મળશે અને તેમનો આભાર માનશે. આ સિવાય રાહુલ ગાંધી 12 જૂને વાયનાડ પણ જઈ શકે છે.

રાહુલ ગાંધી પહેલીવાર રાયબરેલી બેઠક પરથી લોકસભા ચૂંટણી લડી રહ્યા હતા. તેમના પહેલા સોનિયા ગાંધી અહીંથી સાંસદ હતા. સ્વાસ્થ્યના કારણોને ટાંકીને સોનિયા ગાંધીએ આ વખતે લોકસભા ચૂંટણીમાં ભાગ લીધો ન હતો. તેણે પોતાની સીટ રાહુલ ગાંધીને આપી. રાહુલ ગાંધી અહીંથી 3,90,030 મતોથી જીત્યા હતા. આ ચૂંટણીમાં તેમને 6,87,649 વોટ મળ્યા જ્યારે હરીફ ભારતીય જનતા પાર્ટીના દિનેશ પ્રતાપ સિંહને 2,97,619 વોટ મળ્યા. રાહુલ ગાંધીએ વાયનાડ સીટ પર પણ મોટી જીત હાંસલ કરી છે. તેમણે સીપીઆઇ ઉમેદવાર એની રાજાને 3,64,422 મતોથી હરાવ્યા. અહીં તેમને કુલ 6,47,445 વોટ મળ્યા.