યૌન શોષણ મામલે બ્રિજભૂષણને ઝટકો :આરોપો ઘડવા આદેશ
6 મહિલા રેસલર્સે યૌન શોષણના આરોપ લગાવ્યા હતા
મહિલા કુસ્તીબાજો સાથે જોડાયેલા યૌન શોષણના મામલામાં પૂર્વ કુસ્તી સંઘના પ્રમુખ બ્રિજભૂષણ શરણ સિંહને મોટો ઝટકો લાગ્યો છે. દિલ્હીની રાઉઝ એવન્યુ કોર્ટે શુક્રવારે બ્રિજ ભૂષણ સામે આરોપો ઘડવાનો આદેશ આપ્યો છે. કૈસરગંજના બીજેપી સાંસદ બ્રિજભૂષણ શરણ સિંહ વિરુદ્ધ કલમ 354, 506 અને અન્ય કલમો હેઠળ આરોપો ઘડવામાં આવ્યા છે. યૌન શોષણના આરોપોના કેસની તપાસ કરી રહેલી દિલ્હી પોલીસે જૂન 2023માં બ્રિજ ભૂષણ વિરુદ્ધ ચાર્જશીટ દાખલ કરી હતી.
રાઉઝ એવન્યુ કોર્ટના એડિશનલ ચીફ મેટ્રોપોલિટન મેજિસ્ટ્રેટ પ્રિયંકા રાજપૂતે આ આદેશ આપ્યો હતો. કોર્ટે કહ્યું કે બ્રિજ ભૂષણ સામે આરોપ ઘડવા માટે પૂરતા પુરાવા છે. બ્રિજ ભૂષણ વિરુદ્ધ કલમ 354 (કોઇ મહિલાની ગરીમાને ઠેસ પહોંચાડવાના ઇરાદા સાથે તેના પર હુમલો અથવા ફોજદારી બળ), 354-A (જાતીય સતામણી) અને કલમ 506 (ગુનાહિત ધમકી) હેઠળ આરોપો ઘડવાનો આદેશ આપવામાં આવ્યો હતો. કોર્ટે એમ પણ કહ્યું કે વિનોદ તોમર વિરુદ્ધ કલમ 506(1) હેઠળ આરોપો ઘડવા માટેના પુરતા પુરાવા છે.
15 જૂન, 2023ના રોજ દિલ્હી પોલીસે બ્રિજ ભૂષણ સામે કલમ 354, 354-A (જાતીય સતામણી), 354-D (પીછો કરવો) અને કલમ 506 (ગુનાહિત ધમકી) હેઠળ ચાર્જશીટ દાખલ કરી હતી. ભાજપના સાંસદ પર છ કુસ્તીબાજોએ જાતીય સતામણીનો આરોપ લગાવ્યો હતો. તેમની ફરિયાદના આધારે પોલીસે બ્રિજભૂષણ સિંહ વિરુદ્ધ એફઆઇઆર નોંધી હતી.
નોંધનીય છે કે વર્લ્ડ ચેમ્પિયનશિપ મેડલ વિજેતા વિનેશ ફોગાટ દેશ અને અન્ય બે કુસ્તીબાજોએ બ્રિજ ભૂષણ શરણ સિંહ પર જાતીય સતામણીના આરોપો લગાવ્યા હતા અને તેમની સામે વિરોધ દર્શાવ્યો હતો. દિલ્હી પોલીસે બ્રિજ ભૂષણ વિરુદ્ધ કેસ નોંધ્યો હતો પરંતુ જૂલાઈમાં બ્રિજ ભૂષણને સ્થાનિક કોર્ટમાંથી જામીન મળી ગયા હતા.