ભાગ્યે જ વિદેશ જતા રશિયન રાષ્ટ્રપતિ પુતિન ભારત આવશે : વડાપ્રધાન મોદી સાથે બેઠક, રાષ્ટ્રપતિ મુર્મુ સાથે ડીનર લેશે

રશિયાના રાષ્ટ્રપતિ વ્લાદિમીર પુતિન 4-5 ડિસેમ્બરે 23મા ભારત-રશિયા વાર્ષિક સમિટમાં ભાગ લેવા માટે ભારત આવશે. વડા પ્રધાન નરેન્દ્ર મોદીના આમંત્રણને પગલે આ મુલાકાત થઈ રહી છે.અમેરિકા દ્વારા નવી દિલ્હીના રશિયન તેલ આયાત પર દંડાત્મક ટેરિફ લાદવામાં આવ્યા પછી છેલ્લા કેટલાક મહિનામાં બંને દેશો વધુ નજીક આવ્યા છે ત્યારે પુતિનની આ મુલાકાત બંને દેશો વચ્ચેના આત્મીય સંબંધોનો નિર્દેશ પૂરી પાડનારી બની રહેશે.

આ મુલાકાત ની જાણકારી આપતા વિદેશ મંત્રાલયે જણાવ્યું કે વડાપ્રધાન શ્રી નરેન્દ્ર મોદીના આમંત્રણ પર, રશિયન ફેડરેશનના રાષ્ટ્રપતિ વ્લાદિમીર પુતિન 23મા ભારત-રશિયા વાર્ષિક શિખર સંમેલન માટે 4-5 ડિસેમ્બર 2025 દરમિયાન ભારતની રાજ્ય મુલાકાત લેશે,” પુતિન તેમની ભારત મુલાકાત દરમિયાન પીએમ મોદી સાથે બેઠક કરશે.એ ઉપરાંત રાષ્ટ્રપતિ દ્રૌપદી મુર્મુ રાષ્ટ્રપતિ ભવનમાં રશિયન નેતાનું સ્વાગત કરશે અને તેમના માનમાં ભોજન સમારંભનું આયોજન કરશે.

આ પણ વાંચો :વ્હાઇટ હાઉસ નજીક શૂટિંગ બાદ ટ્રમ્પ આકરા પાણીએ : ત્રીજા વિશ્વના બધા જ દેશોના નાગરિકો માટે અમેરિકાના દરવાજા બંધ

સરકારે જણાવ્યું હતું કે પુતિનની મુલાકાત ભારતીય અને રશિયન નેતૃત્વને દ્વિપક્ષીય સંબંધોમાં પ્રગતિની સમીક્ષા કરવાની, વ્યૂહાત્મક ભાગીદારીને મજબૂત બનાવવા માટે વિઝન નક્કી કરવાની અને પરસ્પર હિતના પ્રાદેશિક અને વૈશ્વિક મુદ્દાઓ પર વિચારોનું આદાન-પ્રદાન કરવાની તક પૂરી પાડશે.

આ પણ વાંચો :અર્થતંત્રની ગાડી પુરપાટ: GDP અનુમાનથી પણ વધુ! અમેરિકાનાં ટેરીફ હુમલા છતાં ભારતમાં આર્થિક ગતિવિધિમાં તેજી

નોંધનીય છે કે ઓગસ્ટમાં રાષ્ટ્રીય સુરક્ષા સલાહકાર અજિત ડોભાલની મોસ્કો મુલાકાત દરમિયાન રશિયન રાષ્ટ્રપતિની ભારત મુલાકાતની જાહેરાત કરવામાં આવી હતી. તે સમયે તારીખો નક્કી કરવામાં આવી ન હતી. એ પછી સપ્ટેમ્બરમાં ચીનમાં શાંઘાઈ કોઓપરેશન ઓર્ગેનાઈઝેશન (SCO) સમિટ દરમિયાન પીએમ મોદી અને પુતિન મળ્યા હતા. તેમણે રશિયન નેતાની લિમોઝીનમાં એક કલાક લાંબી ચર્ચા કરી હતી.