ટેરિફ વોરની આશંકા વચ્ચે રૂપિયો ધબાય નમઃ ડોલર સામે સરકીને 87.29 ઉપર પહોંચી ગયો
અમેરિકાના રાષ્ટ્રપતિ ડોનાલ્ડ ટ્રમ્પનાં નિર્ણયોથી ટેરિફ વૉરમાં ભડકો થયો છે અને તેની અસર ભારતીય રૂપિયા પર પણ પડી છે. સોમવારે શરૂઆતમાં જ કારોબારમાં રૂપિયો 67 પૈસા ઘટીને 87.29 પ્રતિ ડોલરના નીચા સ્તરે પહોંચી ગયો હતો. વિશ્વભરમાં વેપારી યુદ્ધ ફાટી નીકળવાની આશંકા વચ્ચે ભારતીય ચલણમાં આ તીવ્ર ઘટાડો નોંધાયો છે.
શુક્રવારે ઇન્ટર બેન્ક ફોરેન એક્સચેન્જ માર્કેટમાં રૂપિયો 86.61 પર બંધ થયો હતો પણ સોમવારે બજાર ખુલતાની સાથે જ તેમાં ધબડકો બોલી ગયો હતો અને ડૉલર સામે રૂપિયો સરકીને 87.29ના નીચલા સ્તરે પહોંચી ગયો હતો. ફેબ્રુઆરી 2023 પછીની રૂપિયાની આ સૌથી નબળી શરૂઆત હતી.
ભારતનો રૂપિયો તો ઉંધા માથે પટકાયો જ છે, પણ આપણે દુનિયાના અન્ય દેશોની કરન્સી જોઇએ તો તેમના પણ હાલહવાલ થઇ ગયા છે. રૂપિયાની જેમ જ ચીન, મેક્સિકો અને કેનેડાની કરન્સીમાં પણ જબરજસ્ત ઘટાડો થયો છે. ચીની કરન્સી યુઆન પણ રેકોર્ડ નીચલા સ્તરે પહોંચી ગઈ છે. મેક્સિકાનો પેસો અને કેનેડાનો ડોલર પણ તેમની સૌથી નબળી સ્થિતિમાં આવી ગયા છે અને અમેરિકાનો ડોલર એકદમ મજબૂત બની ગયો છે.
