તમિલનાડુમાં દલિત યુવકો સાથે કેવી અધમતા આચરવામાં આવી વાંચો..
દેશના અનેક ભાગોમાં હજુ પણ દલિતોને નિશાન બનાવાઇ રહ્યા છે અને એમની સાથે બર્બરતા આચરવામાં આવી રહી છે. તમિલનાડુના તિરુનવેલીમાં માનવતાને લજવતી આવી જ ઘટના સામે આવી છે. અહીં દલિત સમુદાયના અનુસૂચિત જાતિના બે યુવકો પર કથિતરૂપે હુમલો કરવા અને તેમને નગ્ન કરી તેમના પર પેશાબ કરવાની હચમચાવી મૂકે તેવી ઘટના સામે આવી છે. આ મામલે કુલ 6 લોકોની ધરપકડ કરી લેવામાં આવી છે. રસ્તા પરથી પસાર થતાં લોકોમાંથી કોઈએ યુવકોને બચાવ્યા નહતા.
પોલીસે જણાવ્યું કે આ મામલે ધરપકડ કરાયેલા તમામ લોકો 21 થી 25 વર્ષની વયજૂથના હતા જે ઘટનાના સમયે નશામાં ચૂર હતા. આ તમામ લોકોએ બંને દલિત યુવકોને માર્યા હતા અને તેમને પોતાની જાતિની ઓળખ આપવા મજબૂર કર્યા હતા.
6 લોકોએ જૂથમાં આવીને બંને યુવકોને ઘેરી લીધા હતા અને તેમના પર હુમલો કરી દીધો હતો. આ દરમિયાન આરોપીઓએ તેમના કપડાં ઉતરાવી તેમના પર પેશાબ કર્યો હતો. થાચનાલ્લુર પોલીસે કહ્યું કે બંને દલિત યુવક થમિરાબરાની નદીમાં નહાઈને પાછા આવી રહ્યા હતા. અમે આ મામલે એસસી/એસટી એટ્રોસિટી એક્ટ અને આઈપીસીની વિવિધ કલમો હેઠળ કેસ નોંધ્યો છે.
