રાજકોટના યુવકનો દિવના નાગવા બીચ નજીક કારમાંથી મૃતદેહ મળી આવતાં ચકચાર: આત્મહત્યા કે બીજું કાંઈ? પોલીસે વધુ તપાસ હાથ ધરી
રાજકોટના મવડી પ્લોટ વિસ્તારમાં રહેતા 37 વર્ષીય યુવકનો દિવના નાગવા બીચ નજીકથી કારમાંથી મૃતદેહ મળી આવતાં ચકચાર મચી જવા પામી હતી.
આ અંગે વધુમાં જાણવા મળ્યા પ્રમાણે મંગળવારે બપોરના અરસામાં દિવના નાગવા બીચ પાસે જ આવેલા રિસોર્ટ બહાર પડેલી કારમાંથી મૃતદેહ મળી આવ્યો હતો. આ કાર બારેક કલાકથી એક જ સ્થળ ઉપર પડેલી હોય ત્યાંથી પસાર થનારા રાહદારીના ધ્યાન પર આવી ગઈ હતી. કશુંક અજુગતું બન્યાનું લાગતાં પોલીસને જાણ કરવામાં આવી હતી. પોલીસે દોડી જઈ કાર ખોલવાનો પ્રયાસ કરતા તમામ દરવાજા લોક હતા જેથી પોલીસે દરવાજો તોડતાં જ અંદરથી મૃતદેહ મળી આવ્યો હતો.
આ પછી કારની તલાશી લેવામાં આવતાં આધારકાર્ડ મળી આવ્યું હતું જે હિતેશ હરસુખભાઈ સેંજલિયાના નામનું હતું. આ પછી આધારકાર્ડમાં રહેલી તસવીર અને મૃતદેહની તપાસ કરાતાં આ મૃતદેહ હિતેશ સેંજલિયાનો જ હોવાનું ખુલ્યું હતું. કારમાંથી મોબાઈલ પણ મળી આવ્યો હોય તેના આધારે પોલીસે આગળની તપાસ આદરી હતી. હિતેશના મૃત્યુનું આખરે કારણ શું હશે તે જાણવા પોલીસે પોસ્ટમોર્ટમ કરાવ્યું હતું. આ બનાવ આત્મહત્યાનો છે કે બીજું કોઈ કારણ છે તે ટૂંક સમયમાં જ બહાર આવે તેવી શક્યતા પોલીસે વ્યક્ત કરી હતી.
