વેજાગામ તથા રામપરા બેટી ગામની કિંમતી જમીનો મામલે રાજકોટ કલેક્ટરનું કડક વલણ: 46 વર્ષ જૂની જમીન સરકાર હસ્તગત કરવા આદેશ
રાજકોટ નજીક વેજાગામની કરોડની કિંમતની વિવાદીત જમીન તથા કુવાડવા હાઈ-વેના રામપરા બેટી ગામની જમીનના વિવાદ બાબતે કલેક્ટર ડો.ઓમપ્રકાશ દ્વારા કડક વલણ સાથે બન્ને જમીનોમાં સરકાર તરફે નિર્ણય લેવાયો છે. વેજાગામની જમીન સરકાર હસ્તગત કરવા તેમજ રામપરા બેટીની જમીન ફાળવણીની નોંધ રદ કરતા આદેશ કરાયા છે.
વેજાગામની 46 વર્ષ જૂના જમીન વિવાદમાં 1968માં પ્રમોલગેશન સમયે આ જમીન સરકારી પડતર હતી. જે તે સમયે કોઈ વાંધો લેવાયો ન હતો. 41 વર્ષના લાંબા સમય બાદ સોમાભાઈ મેરૂભાઈ દ્વારા નાયબ કલેક્ટર સમક્ષ અપીલ કરાઈ હતી. જે તે સમયે તત્કાલીન નાયબ કલેક્ટરે સરકારી જમીન ખાનગી ઠેરવી દીધી હતી. આ જમીનમાં એવું ફલિત થયું કે વિલંબ માફીની અરજી વિના કાયદાના દાયરા બહાર જમીન ખાનગી થઈ ગઈ હતી. નાયબ કલેક્ટરનો જૂનો હુકમ રદ કરીને કિંમતી જમીન સરકાર હસ્તક કરવાનો કલેક્ટર દ્વારા આદેશ કરાયો છે.
કલેક્ટરના આ આદેશ સામે પક્ષકારોને મહેસુલ વિભાગમાં અપીલમાં જવા 90 દિવસનો સમય અપાયો છે. અન્ય એક આવા કેસમાં રામપરા બેટી ગામની કરોડોની કિંમતની સર્વે નં.45ની છ એકર જમીન ફાળવણીની 51 વર્ષ જૂની નોંધ કલેક્ટર દ્વારા રદ કરવામાં આવી છે. વર્ષ 1967માં નાયબ કલેક્ટરના હુકમથી રામપરા બેટીની જમીન ભીમાભાઈ ભરવાડને નવી અવિભાજ્ય શરતે સાંથણીમાં અપાઈ હતી. જે તે સમયે જમીનનો કબજો સાંથણીદારો દ્વારા લેવાયો ન હતો. જે જમીન 2018માં મામલતદાર દ્વારા જમીન કબજો વારસદારોને સોંપવા અને રેવન્યુ રેકર્ડમાં નોંધ પાડવા આદેશ કરાયો હતો. મામલતદાર સત્તા બહાર જઈ કરેલા આદેશ ફાળવણી નોંધ રદ કરતો આદેશ કરી 90 દિવસની મહેતલ અપીલ માટે અપાઈ છે.
