રાજકોટ : ટ્રેનમાં ઉતરેલા કેરેલિયનને પોલીસ મથકે લઇ જઇ ખંખેરી લેવાયો ! બેગમાંથી બોટલ નીકળતા મોટા રકમની થઈ ડિમાન્ડ
રાજકોટ રેલવે પોલીસ સ્ટેશન પર ગુનાઈત ઇસમો પર નજર રાખવા કે આવી પ્રવૃત્તિઓ અટકાવવા માટે ખડેપગે હોય છે પણ સાથે ઘણાખરા શિકારની પણ શોધમાં રહેતા હોય વજનદાર લગેજ, થેલો લાગે કે ચહેરો, પગ પર ડગુમગુ દેખાય તો સીધા જ ઉઠાવી લેવા હોવાની માફક ટ્રેનમાંથી ઉતરેલા કેરેલિયન મુસાફરને બેગમાં બોટલ દેખાતા પોલીસ મથકમાં લઈ જઈ ખનખનીયામાં છ આંકની ડિમાન્ડ બાદ ચોક્કસ આંકડામાં ખંખેરી લઈ જવા દેવાયો હોવાની રેલવેના સૂત્રોમાં ચર્ચા છે.
રેલવે સ્ટેશન પર સંભવતઃ ગઈકાલે સવારે એક ટ્રેન આવી હતી. જેમાંથી અન્ય પ્રાંતના કદાચ કેરેલાનો એક વ્યક્તિ ઉતર્યો હતો ત્યાં હાજર ચાર જેટલા પોલીસબાબુએ સીધો અટકાવ્યો. લગેજ ચેક કરતાં અંદર ભાવતું હતું તે… માફક બોટલ નીકળી હતી. કેરેલિયને શરૂઆતમાં તો દાદ ન આપી મેહુલિયા વરસે અને દિવ્યતેજ દેખાયની જેમ પોલીસ મથકમાં લઈ જવાયો હતો.
કેસ નહીં પણ કદાચ કેશની શોધમાં રહેલા એ બાબુઓ દ્વારા પતાવવું હોય તો સ્થાનિક એક વ્યક્તિ મારફતે છ આંકમાં ડિમાન્ડ મુકાઈ હતી. અંતે વચેટિયાએ વ્યક્તિ દ્વારા હા-ના, હા-ના બાદ એક ચોક્કસ આંક ફિક્સ થયો હતો અને મિશન પાર પડતા એ વ્યક્તિને મુક્ત કરી દીધો હતો. રેલવેના જાણકાર સૂત્રોનું કહેવું છે કે, આવું વાઢકાપનું તો ચાલતું રહે છે.
મુસાફર અને લઈ જનારા બાબુઓ બન્ને જાણીતા હતા અને ઓળખાણ, ચા-પાણી માટે રેલવે પોલીસ સ્ટેશનમાં લઈ જવાયો હતો અને કપાયો, કપાયોની વાત ઉડી હતી ? સત્ય શું છે તે તો તેઓ જ જાણતા હશે. કદાચ સીસી કેમેરાઓને ખ્યાલ હશે ? બાકી આવી ખંખેરાયાની ચર્ચા કે વાતો ઉડી છે.
